ایران کې د انقلابي ګارد دوه مهم غړي وژل شوي
کابل ټکی کام (سه شنبه، ۲۴ غبرګولی، ۱۴۰۱ل)
د ایراني رسنیو د راپورونو له مخې د ایران د انقلابي ګارډ د هوایي ځواکونو دوه مهم غړي “علي کماني” او “محمد عبدوس” تېره ورځ د پوځي ماموریت پر مهال وژل شوي.
د ایران دفاع وزارت د یوې خبر پاڼې په خپرولو سره ویلي، چې دا دواړه سرتیري تېره ورځ ناوخته د ایران “خمین” ښار کې وژل شوي دي.
په ورته مهال د ایران انقلابي ګارد د خپلو مهمو غړو وژنه خواشینونکې بللې او یاد کسان یې اتلان او شهیدان بللي دي.
باید وویل شي چې د انقلابي ځواکونو د دغو دواړو مهمو غړو د وژل کېدو په اړه نور جزیات نه دي خپاره شوي؛ خو په دې وروستیو کې د ایران په بیلا بیلو ولایتونو کې ځینې مهم ایراني چارواکي وژل شوي چې د پړې ګوته یې اسرائیلي استخباراتو موساد ته نیول کيږي.
