کابل ټکی کام (شنبه، ۴ چنګاښ، ۱۴۰۱ل)
سره له دې چې د روسیې ولسمشر ولادمیر پوتین امریکا ته خبرداری ورکړی و که د لرې واټن ویشتونکي توغندیو سیستم اوکراین ته ورکړي، مسکو به په لویدیځ کې نوي اهداف په نښه کړي خو د اوکراین د دفاع وزارت تازه تائید کړې چې د امریکا لخوا ورته د توغندیو دا سیستمونه ورسیدلي.
د اوکراین د دفاع وزیر “اولینسکي ریزنیکوف” هیله ښودلې چې د توغندیو دا سیستم به چې قوي وسله ده، په جګړې کې کیف ته برلاسی ورکړي.
ریزنیکوف د امریکا د دفاع د وزیر “لویډ آسټن “څخه د دې سیستم د ورکړې له کبله مننه کړې.
د اوکراین د دفاع وزیر دا نه دي ویلي چې امریکا څو دانې سیستمونه ورکړي خو دومره یې ویلي چې دا لرې واټن ویشتونکي توغندي د دې اړتیا لري چې وکړای شي په ښه توګه د روسیې د هغو توغندیو د واټن سره مقابله وکړي چې د دنباس په سیمه کې یې په اوکرایني سرتیرو د برید کولو لپاره کاروي.
باید وویل شي چې امریکا داسې مهال اوکراین ته د توغندیو ویشتونکی پرمختللی سیستم ورکوي، چې روسي ځواکونه د اوکراین په ختیځ کې خپل پرمختګ ته دوام ورکوي او نن یې مهم او ستراتيژیک “سیورودونیڅک” ښار نیولی دی.
