کابل ټکی کام (دوشنبه، ۶ چنګاښ، ۱۴۰۱ل)
د اسلامي امارت ویاند او د اطلاعاتو او فرهنګ وزارت مرستیال وزیر “ذبیح الله مجاهد” خبر ورکړی، چې په روانه اوونۍ کې به په کابل کې د علماوو یوه ستره غونډه جوړه شي.
مجاهد ویلي، چې د اسلامي امارت له مشرتابه څخه علماوو بیا بیا د یوې غونډې د جوړېدو غوښتنه کوله چې مشرتابه هم د دوی غوښتنه ومنله.
مجاهد ټینګار کړی، چې دا غونډه به د اولس د هیلو او غوښتنو په اساس جوړيږي نو د هيواد له ټولو ولايتونو او ولسواليو څخه به ګڼ شمیر علماء کرام او قومي مخور پکې ګډون کوي.
که څه هم مجاهد د یادې غونډې د دقیقې نیټې په تړاو څه نه دي ویلي خو کابل ټکی کام ته رسېدلي معلومات ښیي چې دغه غونډه به سبا سه شنبه یا بله ورځ د چهارشنبې په ورځ پیل شي او درې ورځې به دوام کوي.
