کابل ټکی کام (جمعه، ۱۷ چنګاښ، ۱۴۰۱ل)
د افغانستان د ملي دفاع وزارت وايي، چې ددغه وزارت سرپرست وزیر د قطر د لوی درستيز سره کتلي دي.
د وزارت په خبرپاڼه کې راغلي، چې د ملي دفاع وزارت سرپرست وزیر مولوي محمد يعقوب «مجاهد» او ور سره مل پلاوي د قطر هېواد له لوی درستيز الفريق الرکن سالم حمد عقيل النابت سره کتلي دي.
سرچينه زياتوي، په دې کتنه کې دواړو لورو په امنيتي او دفاعي برخو کې د دوه اړخيزو همکاريو د پراختيا په باب بحث او خبرې کړي.
د ملي دفاع سرپرست وزیر د دوست هېواد قطر د همکاریو مننه کړې او د لا زیاتو همکاریو غوښتنه یې کړې.
د ملي دفاع وزارت سرپرست مولوي محمد یعقوب مجاهد په مشرۍ د ا.ا يو رسمي پلاوي په قطر کې د دې هیواد د امیر د ملي امنیت سلاکار محمد بن احمد المسند، نورور چارواکو سره ليدلي او ددغې هيواد د مشتركو نظامي عملیاتو له مرکز څخه يې لیدنه ترسره کړې ده.
