له برېتانیا غوښتنه؛ اچ آر ډبلیو وایي افغانستان کې د خپلو کړنو حساب ورکړئ

کابل ټکی کام (پنجشنبه، ۲۳ چنګاښ، ۱۴۰۱ل)

وروسته تر هغه چې برېتانوي رسنيو راپور ورکړ ،چې د دغه هېواد کومانډو ځواکونو به په افغانستان کې د شپنيو عملياتو پر مهال له يو بل سره په سيالۍ ملکي افغانان وژل، د بشري حقونو د څار سازمان “اچ آر ډبلیو” ويلي، چې افغانستان کې د برېتانوي ځواکونو جنګي جرمونه خورا بوږنوونکي دی او بايد هغه ځواکونه محاکمه شي ،چې د ملکي افغانانو په وژنه تورن دي.

د دغه سازمان چارواکي زياتوي چې برېتانيا بايد د دې وژنو په اړه محکمې ته حاضره شي او د خپلو کړنو حساب ورکړي.

دا سازمان پر داسې مهال دا څرګندونې کوي چې تېره اوونۍ يو شمېر رسنيو راپور ورکړ ،چې د برېتانيا د کومانډو ځواکونو يوې ډلې په يوه مياشت کې په لسګونو بېګناه افغانان د عملياتو پر مهال وژلي وو.

باید وویل شي چې په افغانستان کې د برېتانوي ځواکونو لخوا د ملکي افغانانو د وژنو تر انکشاف وروسته په دغه هیواد د نړیوالو بشري حقونو د سازمانونو فشار مخ پر ډیرېدو دی او تازه د برېتانیا تلونکي لومړي وزیر “جانسون” ویلي، چې تر قانون هېڅوک لوړ نه دي او په افغانستان کې په جنایتونو تورن سرتېري به خامخا سزا وویني.