کابل ټکی کام (يکشنبه، ۲۶ چنګاښ، ۱۴۰۱ل)
د افغانستان د بهرنيو چارو وزارت وايي، چې نن د بهرنیو چارو وزیر مولوي امیرخان متقي د مالیزیا هیواد له لوري د افغانستان لپاره د بهرنیو چارو وزير ځانګړي سلاکار «داتو احمد اعظم عبدالرحمن» او د جنوبي او مرکزي اسیا مرستیال سکرتر ښاغلي محمد اظهر مزلان او مل لوړ رتبه پلاوي سره په بېلابېلو موضوعاتو خبرې کړي دي.
د بهرنيو چارو وزارت مرستيال وياند حافظ ضياء احمد وايي، په ناسته کې په تجارت، اقتصادي اړیکو، بانکي سکتور، د زدکړو په بهير او دوه اړخيزو همکاریو خبرې شوي دي.
ښاغلي احمد په خپل ټويټر اکاونټ په خپره کړې خبرپاڼه کې ليکلي، چې ښاغلي متقي د دې ناستې پر مهال وويل، چې په افغانستان کې د پانګونې لپاره ښه فرست رامنځته شوی او د اسلامي بانکدارۍ تر څنګ له افغانانو سره د تعليمي برسونو او ظرفیت لوړونې په برخه کې يې د همکارۍ غوښتنه وکړه.
مالیزیايي پلاوي وویل: چې د افغان حکومت سره به ښکيلتيا ته دوام ورکوي او غوښتنو ته د لاسرسي په پار به یې پوره هڅې وکړې، هغوی زیاته کړه چې په دې لټه کې دي چې پرمختګونه رامنځته کړي او له افغانانو سره همکارۍ دوامداره وساتي.
