د بیت الله شریف په مطاف او مسجد نبوي شریف کې چې کوم مرمر “رخام” استعمال شوې دی، دغه مرمر د” تاسوس” په نامه یادیږي، او د یونان هیواد په اثینا ولایت کې د یو غره څخه بیت الله شریف ته راوړل شوې دی.
دغه مرمر کوم عادي رخام نه دي، بل کې ډیر نادر او مهم خواص لري، په شدید لمر کې هم ډیر نه ګرمیږی، د شپي لخوا رطوبت جذبوي، او هر کله چې پرې د لمر وړانګې ولږیږي، د شپي لخوا یی چې کوم رطوبت جذب کړې وي بېرته یی خارجوي، له همدې امله ځکه خو په شديد لمر کې هم يخ وي، ډیر خلک داسی ګومان کوي، که د دې مرمرو لاندی به اوبه وي.
اصلي او هغه عجیبه قیصه خو دا لاندي ده، په دې هېله چې زړه مو ورته تنګ نه شي، او تر پایه یی ولولئ، چې زه یی په لېکلو تنګ نه شوم، تاسو خو یی باید په لوستلو هیڅ تنګ نه شي.
د سعودي پاچا ملک فهد بن عبدالعزیز آل سعود، د وخت مشهور مصري مهندس دكتور محمد کمال اسماعیل نه غوښتنه وکړه چې د بیت الله شریف، او مسجد نبوي شریف د پراخولو (غټولو) نقشه جوړه کړه، چې اوس وخت کې د ” توسعة ملک فهد په نامه یادیږي” .
مصري مهندس محمد کمال وایی: کله چې مي بیت الله شریف نقشه اماده کړه، ما وغوښتل چې د بیت الله شریف پر ځمکه “مطاف” کې تر ټولو قیمته او ډیر أعلی د یونان هېواد ” تاسوس” رخام ولګوم.
پنځلس کلونه وروسته چې ملک فهد رحمه الله د یادو مرمرو د عجیب ځانګړتیاوو، کمالاتو او اهمیت څخه خبر شو.
راته یی امر وکړو چې دغه مرمر مدینه منوره کې مسجد نبوي ته هم ضرور راوړه، مصري مهندس وایی: په ډیره عجله مې د طیاري ټیکټ واخیسته او یونان ته لاړم.
د “تاسوس” مرمرو شرکت رئیس ته ورغلم، او ورته مې وویل: تاسوس مرمر مې ډیر ضرور په کار دی، جواب کې یی راته وویل: دغه مرمر په لږه اندازه وه، او پخوا خرڅ شوې دی.
مصري عالم وایی ما ورته وویل: موږ چې څو کاله مخکې د بیت الله شریف لپاره سودا وکړه، د هغې نه وروسته یوه اندازه مرمر پاتې و، هغه کوم سوداګر اخیستي دی.
جواب کې راته دشرکت رئیس وویل: کلونه تېر شوې دی آرشیف ته ورشه که امکان و، د مرمرو اخیستونکی په اړه به درته مالومات درکړې.
مصري مهندس وایی: ارشیف ته چې ورغلم یو جیني ناسته وه، ورته مې وویل: کلونه وړاندې ستاسو څخه کوم سوداګر د تاسوس مرمرو سودا کړې ده، دا سوداګر به څوک یی، مالومات یی راکړه، د ارشیف مسؤولې جیني جواب کې راته وویل: دا ډیره زړه معامله ده، موبایل شمیره دې راته پریږده، که چیرته مې ارشیف کې د مرمرو اخیستونکی سوداګر مالومات پيداکړه، بیا به درسره اړیکه ونېسم.
مصري مهندس وایی: په ډیر خپګان او مایوسه د شرکت نه راووتلم، هوټل ته راغلم، سبا ماښام راته د ارشیف مسؤولې زنګ ووهه، چې راشه تاسوس مرمر چې کوم سوداګر اخیستی دی، هغې په اړه مې درته مالومات پیداکړه.
مصري مهندس وایی: چې ورغلم مالومات یی راکړه، یاد تاسوس مرمر د سعودي عربستان یو سوداګر وه، هغې اخیستي وه، ټېکټ مې واخیسته او سېده سعودي ته راغلم، او د هوایی ډګر څخه مستقیماً د هغه سوداګر خوا ته ورغلم.
ورته مې وویل: څو کاله مخکې تا د یونان نه د مرمرو سودا کړې ده، هغه مرمر څه شول.
سعودي سوداګر راته وویل: وخت ډیر تېر شوې دی، زما سوچ کې نه راځې، نو د خپل ګودام مسؤول ته یی غږ کړه، ورته یی وویل: دغه مرمر وګوره چې خرڅ شوې دی او که شته دی.
وایی د ګودام مسؤول راغلی جواب کې یی وویل: دغه مرمر ټول شته هماغسي سلامت موجود دی.
مصري مهندس وایی: ډیر خوشحاله شوم او سعودي سوداګر ته مې سپین چیک ورکړه، ورته مې وویل: چې څومره روپي غواړي په دغه سپین چیک یی زان ته ولیکه، دغه مرمر، نبوي مسجد کې استعمالوو، او د ملک فهد امر دی.
مصري مهندس وایی: سعودي سوداګر راته وویل: چې د مسجد نبوي لپاره یی غواړي په رب مې دې قسم وي، که یو ټنګه هم واخلم، او دا زه خپل افتخار ګڼم، وایی دغه مرمر یی ټول مفته په وړیا توګه راکړه.
د يادونې وړ ده چې، مصري مهندس دکتور محمد کمال اسماعیل د خپل کار په مقابل کې چې اجرة یی میلیونونه ریال کېدل د ابن لادن شرکت څخه وانخېستل، خپل ټول عمر یی د حرمینو شریفینو خدمت ته وقف کړې و، او په کال ۲۰۰۸ مېلادي کې د ۹۹ کلونو په عمر وفات شو.
مآخذونه:
① د حرمینو شریفینو لوی ریاست.
② د العربیة تلوزیون ویب پاڼه.
③ عکاظ جریده.
لېکوال: ذبیح الله ساپی، سه شنبه د ۲۰۲۲ مېلادي کال د جولای ۱۲ مه، رياض، سعودي عربستان.
