کابل ټکی کام (دوشنبه، ۴ زمری، ۱۴۰۱ل)
د اسلامي امارت په مشرۍ د افغان سرپرست حکومت د بهرنيو چارو وزير “ملا اميرخان متقي” د تاشکند کنفرانس ته په وينا کې ویلي، چې نړیوالو سره د دوه اړخیزو ګټو لپاره د مثبت تعامل غوښتوونکي دي.
نوموړي پر امريکا هم غږ کړی، چې د افغانستان بانک ټولې شتمنۍ له قيد او شرط پرته ازادې کړي.
هغه وويل چې د افغانستان پر اقتصادي نظام د امريکا بنديزونو د فقر بنسټيز علت رامنځته کړی، د پانګونې د جذب مخه يې نېولې ده او د نظام هغه فعاليتونه يې ټکني کړي چې ګټه يې يوازې عام ولس ته رسېږي.
د متقي په خبره چې اسلامي امارت په تېرو يوولسو مياشتو کې امنيت ډاډمن کړی، د خلکو لپاره د بنسټيزو خدمتونو وړاندې کول يې روان ساتلي او په لومړي ځل يې خپله مالي بودجه له کورنيو عوايدو څخه چمتو کړې ده.
ده وويل چې د فساد کچه يې صفر کړې او په نظام کې يې هدفمند همه شموليت باوري کړی دی.
ملا امیرخان متقي په خپله وينا کې د اسلامي امارت پر بهرني سياست هم رڼا واچوله او ويې ويل چې حکومت يې اقتصاد محوره بهرنی سياست لري او په پوره عزم سره غواړي چې افغانستان د سولې، ثبات او اقتصادي همکاريو مرکز شي. هغه ټينګار وکړ چې د سيمې او نړۍ امنيت د افغانستان له امنيت سره تړلی چې په وينا يې ټول لوري بايد د افغانستان د امنيت په ټينګښت کې همکاري وکړي.
ښاغلي متقي پر امريکا غږ وکړ چې د دوحې د هوکړه ليک پر بنسټ خپلې ژمنې پوره کړي، د افغانستان بانک شتمنۍ ازادې کړي او د اړيکو د عادي کولو لپاره پر افغانستان اقتصادي بندیزونه لرې کړي.
