کابل ټکی کام (سه شنبه، ۲۲ وږی، ۱۴۰۱ل)
په پنجشير کې د افغانستان اسلامي امارت ځواکونو په تصفيوي عملياتو کې د مقاومت جبهې د څلورو قومندانانو په شمول لسګونه تنه وژل شوي او تر سل پورې ژوندي نيول شوي دي.
د اسلامي امارت وياند ذبيح الله مجاهد وايي، چې دغه پراخ تصفيوي عمليات د پنجشیر ولایت په رخه، دره او افشار ولسوالیوکې د «متمردو باغیانو» پر ضد ترسره شوي دي.
ښاغلي مجاهد په خپل رسمي ټويټر اکاونټ ليکلي، چې په يادو عملياتو کې د ۴ قومندانانو (فهیم کماندو، ملک خان، جواد او محمدیار) په ګډون ۴۰ تنه وژل شوي دي.
مجاهد زياته کړې، د عملياتو پر مهال ۱۰۰ تنه نور وسله وال ژوندي نیول شوي، چې په وينا يې د هغوی وسلې هم د امارتي ځواکونو لاس ته ورغلي دي.
ذبيح الله مجاهد ويلي، چې يادو وسله والو غوښتل د خلکو امنیت خراب کړي.
د يادونې ده، چې د مقاومت ډله چې د پخواني جنګيالي احمدشاه مسعود د زوی احمد مسعود او ځينې پخواني د شمال ټلوالې د قومندانانو ملاتړ له ځان سره لري، چې په وروستيو کې يې په پنجشير کې د اسلامي امارت پرضد فعاليتونه زيات شوي و.
خو ويل کېږي چې پنجشير ته د اسلامي امارت د مشهور نظامي قومندان ملا عبدالقيوم ذاکر په ورتګ د يادې ډلې پرضد پریکنده تصفيوي عمليات پيل شوي دي.
