حسان مجاهد
بدنظري يعني حراموته په شهوت سره کتل؛ يو ناروا عمل او دډيرو فتنو ذريعه ده.
اللهﷻ فرمايي: ژباړه: او ووايه (ای رسوله! ) مؤمنانو ته چې خپل نظر په خپل واک کې وساتي او د خپلو شرم ځايونو ساتنه وکړي، دا د هغوی د پاره ډيره پاکه کړنلاره ده، هغوی چې څه کوي الله پرې خبريږي.او مؤمنانو ښځو ته ووايه چې پټې دې کړي سترکې خپلې ( له نا محرمو ) او د خپلو شرم ځايونو ساتنه دې وکړي .(سورة النور ۳۰/۳۱)
اللهﷻ لومړی دسترګو په کښته کولو او بيا دشرم ځای په ساتنه امر وکړ، ځکه دسترګو غلط استعمال په فحاشي اوفتنه کي دوقوع يوه لاره ده.
رسول الله ﷺ فرمایي«فزنا العين النظر» دسترګو زنا حراموته په شهوت سره کتل دي.رواه البخاري ۶۷۴۳
معاصر علماء ليکي چي تصويرونو او فلمونو ته کتل هم داسي حرام دی لکه اصلي نظر، بلکې تراصلي نظر فتنه پکې زياته ده ځکه اصلي نظر محدود وي خوله فلم او تصويرڅخه ډيره استفاده کیدلای شي.
خو دتأسف وړخبره داده چې نن دغه ګناه دومره عامه شوې ده اومسلمانان دومره ورسره اشنا شوي دي چي خلګو ته ګناه نه ښکاري، ددې دوه علته کيدای شي:
۱_ دګناه دوسائلو ډيروالی
پخوا به دبدنظري امکانات کم وو خواوس په لږوخت کي څوک کولی شي ددنيا نامحرمو ښځو ته په يوه لحظه ښه په اطمینان سره وګوري؛ ځکه کفارو دهر مسلمان جيب ته دګناه او فحاشي اسباب ورسول.
۲_دغربي ديموکراسۍ په نتيجه کي دښځو مطلقه واکمني او آزادي، مخلوط تعليم او داسې نور.
دبدنظري زيانونه
۱_دنورواندامونوګناه
دپورته آيت دآخري جملې«ان الله خبير بما یصنعون» په تفسير کي علامه آلوسي رحمه الله وايي «باستعمال سائرالحواس» اللهﷻدنورو اندامونو په استعمال علم لري، ددې جملې له مخکې سره مناسبت داده چي کله نظر غلط استعمال شي نو سترګي د کتل شوي انسان دليدلو، غوږونه دهغه دآواز داوريدلو، پښې دهغه طرفته دتللو، لاسونه دهغه سره دملاويدلو اوزړه دهغه سره دخبروکولو تمنا او کوشش کوي چي با لآخره ټول اندامونه دګناه په ارتکاب اخته شي.
۲_ دسترګو په امانت کي خيانت
اللهﷻ وايي(يعلم خائنة الاعين وماتخفي الصدور) ژباړه: اللهﷻ دسترګو په خيانت او دزړه په رازو خبرده او دسترګو خيانت دسترګو په غلط استعمال کی ده.
۳_ درسول اللهﷺ له لوري دلعنت سبب؛
دمشکوة شریف حديث ده«لعن الله الناظر والمنظورالیه»د اللهﷻلعنت دي وي په کتونکي او په هغه چا چي دبل کتلو ته ځان چمتو کوي.
۴_حماقت اوبې عقلي
حکيم الامت اشرف علي تهانوي رحمه الله تعالي وايي هره ګناه کول دلوی حماقت دليل ده، ځکه په ګناه کولو سره دهغه مالک اوخالق نارضائي رامنځته کيږي چي دګناهګار ژوند، مرګ، روح، صحت، مرض، سکون ، بده او ښه خاتمه ټول دهغه په قبضه کي دي، که له ګناهګار څخه يوه سترګه الله تعالی واخلي نو ټوله دنيا په دي قدرت نه لري چي ده ته هغه ډول سترګه ورکړي.
۵_دزړه کمزوري
کله چي په ښايسته انسان نظر ولګيږي نو بياپه زړه کي یونوع کشمکش، کتل شوي انسان ته ميلان، غلطي وسوسې اوبالاخره کتل شوي انسان ته دنه رسيدا په صورة کي په زړه کي غم او حسرت پيداکيږي چي داټول دزړه دکمزوري اسباب دي.
۶_ طبي نقصانات
بدنظري دډيرو طبي نقصاناتو لامل ګرځي چي له بعض نقصاناتو څخه يې دسرعت انزال او مثانې ناروغي هم يادشوي دي.
۷_ دنعمت ناشکري
سترګي داللهﷻ ستر نعمت ده او ددې نعمت ناشکري دسترګو په غلط استعمال کي ده.
۸_ دسترګو کمزوري
دسترګو دنعمت کفران په بدنظري کي ده او دنعمت په کفران پسي دالله تعالی عذاب متصل وي اويو له عذابونو څخه دسترګو دليد او صحت څخه بې برخي کیدل دي.
له بد نظري څخه داجتناب فائدې
۱_ دالله تعالی دامر اتباع.
۲_ دايمان خوند اودزړه بصيرة
الله تعالی انسان ته جزاء دعمل له جنس دعمل ورکوي، کله چي څوک دالله تعالی له ويري دسترګو حفاظت وکړي نو په عوض کې الله تعالی دزړه بصيرت، حکمت او دايمان خوند ورپه برخه کوي [من ترك شيئاً لله عوضه الله خيراً منه]څوک چي دالله تعالی لپاره کوم کارپريږدي نو په عوض کي الله تعالی تر هغه خير ورپه برخه کوي.
۳_دفتنو مخنيوی
په قران کريم کې دشرمګا حفاظت دسترګو په حفاظت پسي متصل ذکرشو ځکه دسترګو په حفاظت سره دډيرو فتنو او فحاشيو مخنيوی کيږي. نن چې په اسلامي ټولنه کې ډيرو فتنو سر راپورته کړی ده؛ ستر لامل ئې بد نظري ده.
۴_دنعمت شکر
سترګي دالله تعالی ستر نعمت ده او ددې نعمت شکردسترګو په ساتنه کي ده.
۵_دالله تعالی ویره
که دګناه په موقع دسترګو ساتنه وشي نو دادبنده په تقوا دلالت کوي او متقيان خلګ الله تعالی ته ډير نږدې او دسترو نعمتونو مستحقين بلل شوي دي.
