نایجریا پوځ ۲ عسکر په دې تور نیولي دي، چې بوکوحرام ډلې ته یې وسله انتقالوله

کابل ټکی کام ۲۲سلواغه/۱۳۹۴، احمدالله مهاجر
د نایجریا پوځ ادعاء کړې ده، ۲ عسکر یې په دې تور نیولي دي چې په زیاته اندازه وسله او نور مهمات یې د بوکوحرام ډلې ته انتقالول.
د نایجریا د پوځ ویاند ډګروال ثاني کوکاشیکا عثمان رسنیو ته ویلي دي چې «نیول شوي ۲ تنه د ماینونو د خنثی کولو په قطعه کې دندې درلودې، او ډېر امکان لري چې د بوکوحرام ډلې غړیو ته یې د بمونو د جوړولو لپاره روزنې هم ور کړي وي.»
نوموړي زیاته کړې ده چې د دوی پوځ په دې تېرو څو ورځو کې د بوکوحرام ډلې ۳۵ جنګیالي وژلي، او لږ تر لږه درې سوه ملکي وګړي د هغوی له منګولو څخه ازاد کړل شوي دي.