محمد آصف آزاد
غرب او د اسلامي نظام دښمنان په ټول توان هڅه کوي چې اسلامي نظام بریا ته پرېنږدي او له هرې لارې او له هره اړخه یې په یو نه یو ډول له ستونزو، خنډونو او چیلېنجونو سره مخ کړي. هغه که د مخامخ جګړو له لارې وي او یا هم له اقتصادي بندیزونو، رسنیزو جګړو او تبلیغاتو او یا هم له هرې بلې ممکنه لارې وي. غرب په نړۍ کې هر ډول نظامونه زغمي؛ شاهي او سلطنتي، جمهوري او دیموکراتیک، مذهبي (له اسلام پرته) او غیر مذهبي، بېدینه او سیکولر دا ټول موږ وینو چې نړۍ کې شته. غرب ورسره کومه ستونزه نلري. راکړه ورکړه او تعامل هم ورسره لري. په رسمیت یې هم پېژني. خو په دې دومره لویه نړۍ کې او د دومره لوی شمېر مسلمانانو باوجود د نړۍ په یوه څنډه کې هم اسلامي نظام نشي زغملی!
دوی هیڅکله هم نه غواړي نړۍ د عادل اسلامي نظام نمونه یو ځل بیا وویني؛ ځکه په دې سره به بیا د دوی ناچله نظریې، نظامونه او حکومتونه ان پخپله غرب کې هم اخیستونکي ونلري!
دوی پوهیږي، که دا ناکراره نړۍ، دا وحشت او بربریت ځپلې نړۍ، دا وضعي قوانینو محکومه کړې او غلامه کړې نړۍ یو ځل بیا د اسلام حاکمیت وویني؛ نو بیا به ان خپل غربي وګړی هم له اسلام پرته په بل نظام قانع نکړای شي. نن چې په نوره نړۍ کې د اسلامي نظام په وړاندې خنډونه ایجادوي او مخه یې نیسي؛ بیا به په غرب کې هم ورته دا چاره ستونزمنه کیږي. دوی پوهیږي، هغه ډیموکراسي چې څه په زور، څه په زر او څه په چل او تذویر یې په نړۍ منلې یا تحمیل کړې؛ نور د ناکامۍ و خواته روانه ده. خپله بایډن وایي چې ډیموکراسي مو له ګواښ سره مخ ده!
غرب پوهیږي چې ډیموکراسي په څومره شدت د زوال په طرف روانه ده. دا په داسې حال کې چې په بدیل کې یې نړۍ ته بل څه نلري. دوی نه خوښوي؛ خو پوهیږي چې راتلونکی د اسلام دی او د نړۍ ملتونه په ډېرې ناکرارۍ د اسلام حاکمیت ته شېبې شماري!
له همدې امله، کله یې چې په افغانستان کې ماته وخوړه او فزیکي جګړې او اشغال ترک ته اړ شول؛ رسنیزه جګړه یې لا هماغسې په ټول توان ګرمه وساتله. له رسنیو او نړیوالو سازمانونو داسې څرګندونې خپروي چې په افغانستان کې شته اسلامي نظام خدای مکړه ناکام وښیي. خپلو شلکلنو ناکامیو او جنایاتو ته ښه بڼه ورکړي او د ننني اسلامي نظام بریاوې او لاسته راوړنې د نړۍ له سترګو پټې کړي.
رسنۍ نه وایي، هغه هېواد کې چې د امریکا جمع ناټو او متحدینو یې د سوله ساتو په نوم شل کاله جګړه وکړه، خو هېواد یې د یوې ورځې لپاره هم آمن نکړای شو؛ نن ورځ د نړۍ له کم ساري امنیت څخه برخمن دی.
رسنۍ نه وایي، هغه هېواد چې د اداري فساد له امله د نړۍ لومړۍ نمبر و؛ نن پکې فساد نشته.
رسنۍ نه وایي، هغه هېواد چې هلته صفر شوي کوکنار د امریکا او متحدینو د شتون او جګړې پر وخت د کوکنار د کښت او قاچاق په لومړي لېست کې راغلی و؛ اوس پکې کوکنار بېرته له منځه وړل شوي.
رسنۍ نه وایي، هغه هېواد چې امریکا او ملګري یې پکې واکمن و، د معتادینو شمېر پکې له څلورو ملیونو واوښت؛ خو اوس معتادینو د زیاتوالي پر ځای روغتونونو ته وړل کیږي.
رسنۍ نه وایي، هغه هېواد چې د کلنۍ بودیجې ۷۰ سلنه یې د نورو په مرستو ولاړه وه؛ نن یې په خپله د پوره کولو توان موندلی.
رسنۍ نه وایي، هغه تحلیل چې ویل کېده به، په افغانستان کې به اداري نظام له منځه لاړ شي او ادارې به فلج شي؛ خو د یوې ورځې لپاره هم ادارې غیر فعاله نشوې.
رسنۍ نه وایي، هغه تحلیل چې ویل کېده به، افغاني کرنسۍ به خپل ارزښت له لاسه ورکړي او بانکونه به سقوط شي؛ خو برعکس بانکونه فعال او افغانیو خپل ارزښت تر پخوا لوړ وساته.
او…
په دې ټولو تحولاتو، فعالیتونو او پرمختګونو باندې رسنۍ او نړیوال سازمانونه او ادارې غلې دي. خو وضعیت کاملاً د دې برعکس انځوروي.
بېلګې یې ولولئ!
د همدې نومبر په لومړی نېټه م.م وویل چې په افغانستان کې د کوکنارو کښت ۳۲ سلنه زیات شوی! په داسې حال کې چې د همدې کال په اپرېل کې عالیقدر امیرالمؤمنین حفظه الله په افغانستان کې د کوکنارو کرکیله په مطلق ډول منع اعلان کړه.
په ۲۰۰۱م کال کې هم، کله چې اسلامي امارت د کوکنارو کښت باندې بندیز ولګاوه او صفر ته را ښکته شول؛ غربي رسنیو او نړیوالو ادارو د اسلامي امارت دغه اقدام د ستاینې پر ځای د کوکنارو د بیې لوړولو لپاره ګڼلی و!
دا له اسلامي نظام سره د دوی عقده او دښمني څرګندوي.
دې تېره اکتوبر میاشت کې د ګالوپ په نوم یوې مؤسسې افغانستان د نړۍ تر ټولو ناامنه هېواد یاد کړ!
سړی حیران شي چې دا خلک په دروغ ویلو او سپینسترګۍ کې څومره مخکې تللي؟!
یادې مؤسسې ویلي چې افغانستان کې د غلاوو پېښې زیاتې شوي؛ خو که د هغه کابل له اوسېدونکو وپوښتو، چېرته چې د شپې ګرځېدل ځان خپله په خطر کې ورکول ګڼل کېدل او ان د یو موبایل او ساعت لپاره خلک وهل کېدل او وژل کېدل؛ نن ورځ یې ځواب همدا وي چې ډاډه ګرځي او هر وخت او هر چېرې تللی شي.
رسنۍ او نړیوالې ادارې افغانستان د ښځو لپاره خوندي نه ګڼي!
خو په دې حقیقت سترګې پټوي؛ کله چې دلته امریکا او ملګري یې واکمن و، ښځه نه خو په ادارو کې په امن وه او نه هم په کور کې د دوی د چاپو او بمبار څخه مصؤنه وه. پرون ترې زندانونه ډک و، نن یوه هم زندان کې نشته. پرون یې پر وړاندې وروڼه او اولادونه په سپیو داړل کېدل او په ماینونو الوځول کېدل؛ نن هغه د وحشت حالات ټول له منځه تللي.
خو د رسنیو او نړیوالو ادارو غبرګونونه د شته وضعیت په خلاف دي!
زما باور دی چې غرب به هیڅکله هم د اسلامي نظام په وړاندې له رسنیزې جګړې، پروپاګند، تبلیغاتو او له هرې په توان پوره بلې وسیلې څخه درېغ ونکړي او خپله جګړه به روانه ساتي. نو مسلمانانو، په ځانګړې توګه افغانانو ته په کار ده چې دې جګړې ته متوجه واوسي. هو، دوی به دا جګړه ونه دروي. موږ ته په کار ده چې ویښ، ځیرک او فعال واوسو.
ا.ا ته د حکومت او نظام په حیث په کار ده چې په خپلو رسنیو پانګونه وکړي. دې اړخ ته دې هم په کمه سترګه نه ګوري؛ مصرف دې وکړي، د امکاناتو برابرولو ټوله هڅه دې وکړي، افراد دې وروزي. له شته رسنیو او امکاناتو دې اعظمي استفاده وشي. وضعیت دې ګونګ او مبهم نه پرېږدي؛ چې مغرضو او دښمنو رسنیو ته د پروپاګند زمینه برابره شي او د ولسونو تر منځ د بېځایه شکونو او بدګومانیو پیدا کولو سبب شي. د پردیو او پردیپالو هغو رسنیو چې زموږ د دین، هېواد او ملي ګټو او رښتینو ژورنالېستیکو اصولو په خلاف خپرونې او نشرات کوي؛ د هغوی د کنترول هڅه دې وکړي.
هېواد کې شته خصوصي رسنۍ دې اسلامي او ملي ارزښتونو او ګټو ته اولیت ورکړي. د نورو په ګټه نشراتو څخه دې د دین او هېواد د ګټو په خاطر صرف نظر وکړي. واقعیتونو ته دې پوښښ ورکړي. او د هېواد د رښتیني انځور خپرولو هڅه دې وکړي. د پوهاوي په لوړولو کې دې هڅه وکړي.
موږ عامو هېوادوالو ته هم په کار ده چې د نړیوالو مغرضو رسنیو دا له دوه مخی ډک چلند درک کړو. د دوی په پروپاګند او له واقعیت لرې نشراتو باور ونکړو. او د الله جل جلاله دې امر ته همېشه پام وکړو چې فرمایي: (يٰٓأَيُّهَا الَّذِينَ ءَامَنُوٓا إِن جَآءَكُمْ فَاسِقٌۢ بِنَبَإٍ فَتَبَيَّنُوٓا أَن تُصِيبُوا قَوْمًۢا بِجَهٰلَةٍ فَتُصْبِحُوا عَلٰى مَا فَعَلْتُمْ نٰدِمِينَ) الحجرات: ۶
ژباړه: “اې مؤمنانو! كه كوم فاسق تاسې ته له كوم خبر سره راشي، نو تاسې (د خبر په اړه) پلټنه او تحقیق وکړئ، هسې نه چې کومې ډلې ته په ناپوهۍ سره ضرر ورسوئ او بيا پخپلو کړو پښېمانه شئ.”
