(کابل ټکی کام، ١٣٩٨ حوت ٣، شنبه)
په افغانستان کې د ملګرو ملتونو مرستندویه دفتر یا یوناما وايي، په ۲۰۱۹ کال کې د جګړو له امله څه باندې ۱۰۰۰۰ملکي افغانانو ته مرګ ژوبله اوښتې ده.
یوناما په تازه خپاره کړي راپور کې ویلي چې تیر کال ۳۴۰۳ تنه ملکي وګړي وژل شوي او ۶۹۸۹ نور ټپیان شوي دي.
یوناما وايي، دا په پرله پسې ډول شپږم کال دی چې د ملکي تلفاتو شمیر له ۱۰۰۰۰ څخه اوړي.
د یوناما راپور کې ، د تیرکال یوازې د اته سلنه ملکي تلفاتو مسؤولیت پر امریکايي ځواکونو، شپاړلس سلنه پر حکومت، دولس سلنه داعش او پاتې د ۴۷ سلنې ملکي تلفاتو پړه پر طالبانو اچول شوې ده.
خو طالبانو په دې اړه غبرګون ښودلی او د یوناما راپور یې له انصافه لیرې او یو لوریز بللی دی.
طالبانو ویلي په افغانستان کې د ملګرو ملتونو اړوند یاده اداره د امریکایانو لپاره په کمپاین بوخته ده زیاتوي ”که هر آزاد او د عقل خاوند افغان د یوناما راپور او پورته د ړندې محاسبې فیصدي وګوري، له ورایه ښکاري چې یوناما د امریکايي اشغالګرو لپاره په کمپاین بوخته ده او هغوی ته له بشري مکرر او پرلپسې جنایاتو څخه د برأت ورکولو دلایل تراشي.“
طالبان وایي، که څه هم له تیرو نولسو کلونو راهیسې پر افغان خاوره بمبارۍ کېږي خو په وینا یې تیر کال د امریکایي ځواکونو له خوا پر ملکي خلکو بمبارۍ او د چاپو شمیر په بېساري توګه زیات و چې د پنټاګون پخپله وینا ”دوی له ۷۰۰۰ زیات بمونه په افغان خاوره اورولي دي.“
دغه راز طالبان وایي، په تیرکال کې د شپنیو چاپو، د سي آی ای اړوند د (صفریک، صفردو، صفرسه، ضربتیانو او په کندهار کې ځانګړي ځواک) لخوا چې په ملکي افغانانو کوم وحشت شوی، ټول اولس يې شاهد دی او وخت په وخت رسنیو هم راپورونه پرې درلودلي دي.
طالبانو ویلي له اتیا سلنه زیات ملکي تلفات د بهرنیو او ګډو ځواکونو په بمباریو، چاپو او عملیاتو کې اوړي خو د یوناما له خوا امریکایانو ته د اته سلنې تلفاتو منسوبول ددې ښکارندویي کوي چې دغه راپور هم د امریکا تر څارنې لاندې ترتیب او نشرېږي.
”د امریکايي اشغالګرو له دومره ستر وحشت سره سره بیا هم هغوی په ټول کال کې ایله د ۸ سلنې ملکي پيښو مسئول بلل څرګندوي چې د یوناما راپور د امریکا چارواکو تر نظارت لاندې ترتیبیږي او د افغان ولس په سترګو کې د خاورو شیندلو هڅه ده.“
