عباس ستانکزی: زده کړې د ملت حق دی د ښوونځیو دروازې باید پرانېستل شي
کابل ټکی کام (جمعه، ۱۸ لیندۍ، ۱۴۰۱ل)
د بهرنیو چارو وزارت سیاسي مرستیال “شېرمحمد عباس ستانکزي” د کابل لپاره د نوي والي د پېژندنې په غونډه کې یو ځل بیا هېواد کې ټولو ته په مساوي توګه د زدهکړو زمینې پر برابرولو ټينګار کړی.
ښاغلي ستانکزي په یاده غونډه کې وویل، زدهکړې د ملت حق دی او د ښوونځیو دروازې باید پرانېستل شي.
نوموړي د تېر په څېر یو ځل بیا په ټینګار سره وویل چې هېوادونه په علم پرمختګ کوي او اړتیا ده چې هېواد کې د زدهکړو زمینه برابره شي.
د بهرنیو چارو وزارت سیاسي مرستیال همداراز دې غونډه کې ټينګار وکړ چې کار باید اهل کار ته وسپارل شي، څو هېواد له روانو ستونزو او ناخوالو راووځي.
نوموړي د اسلامي امارت په مشرۍ د افغان سرپرست حکومت پر مسوولانو هم غږ وکړ چې خپلې دندې په سمه توګه ترسره کړي او په خبره یې، ولس سره دې نږدې پاتې شي.
