کابل ټکی کام (پنجشنبه، ۱۴ سلواغه، ۱۴۰۱ل)
د مالیزیایي پارلمان مشر “داتو جوهري بن عبدل” په خپلو تازه څرګندونو کې د ترکیې ولسمشر “رجب طیب اردوغان” د مسلمانانو اتل او د اسلامي امت ریښتونی رهبر بللی دی.
د تورکیې د ملي شورا رئیس “مصطفی شینتوپ” د اسلامي همکاریو د سازمان د پارلماني ټولنې د ۱۷ مې غونډې په څنډه کې چې په الجزایر جوړه شوې وه د مالیزیا د پارلمان له مشر سره کتلي او د مالیزیایي پارلمان مشر په دغه کتنه کې ترکي ولسمشر ته نیکې پیرزوینې وړاندې کړې دي.
“شینټوپ” له دوه اړخیزو ښو اړیکو څخه خوښي څرګنده کړه او هیله یې وښوده چې د دواړو هېوادونو د پارلمانونو تر منځ تماسونه او همکارۍ به لا زیاتې او پراختیا ومومي.
د تورکیې د ملي شورا رئیس په دې لیدنه کې ویلي چې د تورکیې او مالیزیا ترمنځه متقابلې اړیکې د ستراتیژیک شراکت تر کچې رسیدلي دغه راز نوموړي په تورکیه کې د جولای د ۱۵ مې کودتا ته په اشارې سره وویل ” د ترهګرۍ سازمان چې په هر هیواد کې فعالیت کوي د هغه هیواد د ملي امنیت لپاره تر ټولو ستر ګواښ دی. هغه وویل چې تورکیې دا ترخه تجربه لیدلې او ټینګار یې وکړ چې یاد سازمان د هغو هیوادونو لپاره چې فعالیت پکې کوي د ملي امنیت خطر هم رامینځته کوي.
سینټوپ وویل چې ترهګریز سازمانونه، د نوي نسل د بې لارې کولو هڅې کوي او د هیوادونو د بې ثباته کولو له لارې خپل فعالیتونه خپروي.
د مالیزیا د پارلمان مشر وویل چې دوی د اسلامي امت پر ضد د جوړو شویو ترهګریزو سازمانونو چې تر شا یې غربي نړۍ ولاړه ده او موخه یې په اسلامي نړۍ کې ده ویرې خپرول دي په هر څه پوهیږي او په دې برخه کې د تورکیې له هڅو څخه کلک ملاتړ کوي.
د نوموړي په خبره ولسمشر “رجب طیب اردوغان” هغه سړی دی چې تل یې د فلسطین د قضیې په ګډون، د افغانستان، سوریې، سومالیا، لیبیا او ورته نورو هیوادونو کې د شته ستونزو د له منځه وړلو لپاره عملي اقدامات کړي نو ځکه ویلی شو چې هغه د مسلمانانو واقعي اتل او رهبر دی.
باید وویل شي چې په ترکیه کې څو میاشتې وروسته ټاکنې کېږي، د کتوونکو په باور اسلامپال اردغان په ترکیې ولس او اسلامي امت کې خپل محبوبیت ساتلی دی او او ډېر امکان شته چې په ټاکنو کې به یوځل بیا بریالی او خپلو سیکولر مخالفینو ته به ماته ورکړي.
