کابل ټکی کام (شنبه، ۱۵ سلواغه، ۱۴۰۱ل)
د راپورونو له مخې ، د افغانستان د پاسپورټ ریاست شاوخوا درې سوه تنه کارمندان په فساد کې د ښکېلتیا له امله له دندو ليرې او يا نيول شوي دي.
د طلوع د راپور پر اساس چې د اسلامي امارت حکومت وياند ښاغلي ذبيح الله مجاهد ورته ويلي، چې سرپرست حکومت د فساد د جرړو له منځه وړلو متعهد دی او دا مهال د پاسپورټ رياست له فساد څخه پاک شوی دی.
ښاغلي مجاهد زياته کړې، تر تحول راتلو وروسته سرپرست حکومت د پاسپورټ له کموالي سره مخ شو، چې ځينې جعل سازان او کمېشن کارانو هلته ځانونه ځاي کړي و، خو وروسته بيا شاوخوا تر ۳۰۰ پورې کارمندان چې په جعل، کمېشن کارۍاو فساد کې ښکېل و له دندو ګوښه او يا نيول شوي او زنداني شوي دي.
د مجاهد په خبره، تر اوسه په پاسپورټ رياست کې تخنيکي ستونزې نه دي حل شوي، نو ځکه د پاسپورټ د وېش لړۍ هم بنده ده.
د پاسپورټ رياست وياند نور اللّٰه پتمن هم وايي، چې ټولې تخنيکي ډلې کار کوي، څو د پاسپورټ اړوند موجوده ستونزې حل او بيا د پاسپورټ د وېش لړۍ پېل شي، خو په خبره يې په اوس وخت کې په عمومي توګه د پاسپورټ د وېش لړۍ درول شوې ده.
