کابل ټکی کام (دوشنبه، ۱۷ سلواغه، ۱۴۰۱ل)
په ترکیه او سوریه کې چارواکي وايي، په دواړو هېوادونو کې زورورې زلزلې څه باندې ۱۲۰۰ کسان وژلي او زرګونه نور ټپیان دي.
زلزله د ترکیې سوېل ختیځ غازي عنتاب کې د سوریې پولې ته نږدې شوې چې د امریکا د ځمکپېژندنې ادارې له مخې د زلزلې کچه ۷٫۸ ښودل شوی دی.
زلزله نن سهار وختي پر ځايي وخت څلور بجې او ۱۷ دقیقې شوې ده. د زلزلې ژوروالی ۱۷٫۹ کیلومتره ژور غازي عنتاب ښار ته څېرمه ښودل شوی دی.
د ترکیې مرستیال ولسمشر فیوټ اوکټای وايي، تر اوسه د وژل شویو شمېر ۹۱۲ ته رسېدلی دی او څه باندې ۵۳۸۳ کسان ټپیان دي.
د سوریې روغتیا وزارت بیا وايي، په دغه هېواد کې د وژل شویو کسانو ۳۰۰ تنو ته رسېدلی او زرګونه نور ټپیان دي.
چارواکي وايي، وېره دا ده چې ښايي دا شمېر به نور هم لوړ شي ځکه په ګڼو وېجاړو شویو ودانیو کې لا هم خلک ایسار دي.
د ترکیې د بیړنیو پېښو اداره وايي، د زلزلې څه باندې ۴۰ ټکانونه حس شوي دي.
