کابل ټکی کام (چهارشنبه، ۲۳ وری، ۱۴۰۲ل)
د راپورونو له مخې ، اسرائیلو په يوه تازه پريکړه کې مسجد اقصی ته د غير مسلمانانو او يهودانو پر ورتګ بندیز لګولی دی.
دا بنديز وروسته تر هغه ولګول شو چې د تيرې سه شنبه په ورځ په مسجد اقصی کې د مسلمانانو او يهودانو ترمنځ تاوتريخوالی رامنځته شو، چې په تعقيب يې پرون ناوخته د اسراييلو لومړي وزير بنيامين نتن یاهو دامنیتي خبرو نه وروسته وويل، چې د رمضان تر پای پورې به مقدس مقام ته (چې یهودان یې په ټیمپل ماونټ بولي) د غیر مسلمانانو او يهودو ورننوتل بند وي.
په يوه بل خبر کې د اسرایلو پوځ ویلي، چې مغربي غاړه کې یې دوه وسله وال فلسطینیان وژلي دي. خو د اسلامي مقاومت ډلو تر اوسه پورې په دې اړه څه نه دي ويلي.
تېره اوونۍ اسرایلي پوځ د مسجد اقصا په حدودو کې د فلسطیني مسلمانانو پرضد عمليات وکړل، چې د هغې غبرګون کې د غزه، جنوبي لبنان او شام نه په اسرایل راکټونه وار شول او اسراييلو يې هم په ځواب کې په بېلابېلو سيمو راکټي حملې وکړې.
