ژباړه: محمد نعیم پرهېز
نن یې د شهادت ۵۷ تلین دی؛ دې ستر شخصیت خپل ځان او هرڅه په اسلام قربان کړل!
د شهات او اعدام په اړه یې لاندې لیکنه ولولئ:
د شهيد سید قطب رحمه الله د اعدام په ورځ د زندان یو مسؤل راغی او شهید قطب (رح) ته يې وویل: اې سیده! د (شهيد) کلمه یعنې څه؟ شهید سید قطب رحمه الله يې په ځواب کې وویل: هغه څوک، چې د شهيد په صفت موصوفیږي شاهدي ورکوي، چې اسلامي قانون د هغه تر ژوند ډېر ارزښتمند دی او په دې لار کې خپل ځان قربان کړي. د محکمې او قضا تر ناستې وروسته، چې کله د شهيد سید قطب د اعدام حکم ورکړل شو، د هغه له وروڼو او دوستانو څخه يوه ترې وپوښتل، ولې دې په دومره صراحت او وضاحت سره خبرې وکړې او د خبرو په بدلولو او حقیقت پټولو سره دې ولې ځان خلاص نکړ؟شهید سید قطب رحمه الله وویل: ځکه د حقیقت پټول او په عقیدتي مسایلو کې په رخصت عمل نه کول روایت نلري.
وروسته د وخت ظالم حاکم جمال عبدالناصر د شهید سید قطب د اعدام حکم امضاء کړ او پر هغه يې د صحت ټاپه ووهله، خو کله چې شهید قطب رحمه الله د خپل اعدام حکم واورېد، ويې ویل: الحمدلله د هغه مقام لپاره چې ما پنځلس کاله هڅه کوله او په اړه يې نارام وم ورته ورسېدم، خو وروسته تر دې، چې طاغوتي او ظالم حکومت د شهید قطب رحمه الله د اعدام حکم وکړ او له هغه يې وغوښتل، چې د جمال عبدالناصر دولت ته يې کوم څه ويلي په اړه يې بښنه وغواړي، خو شهيد قطب رحمه الله وویل: هغه کار چې ما د الله جل جلاله لپاره کړی، هېڅکله به يې بښنه ونه غواړم او بیا یې له هغه وغوښتل، چې د کاغذ پرمخ له جمال عبدالناضر څخه د بښنې او خلاصون غوښتنه وکړي، ترڅو له اعدام څخه خلاص شي.
خو شهيد قطب رحمه الله ځواب ورکړ: په رب قسم، د شهادت ګوته چې په ورځ کې پنځه ځله د الله جل جلاله په وحدانیت او یووالي شاهدي ورکوي، هېڅکله به د طاغوتي او باطل دولت په ګټه شاهدي ورنکړي او زیاته يې کړه، ولې له هغه څخه د بښنې او خلاصون غوښتنه وکړم؟ که په حق زنداني يم، هغه ته تسلیم یم او که په ناحقه وي، زه تر هغه لوی یم چې له باطل څخه د بښنې او خلاصون غوښتنه وکړم.
د درېيم ځل لپاره چې د هغه د اعدام لپاره وخت پاتې نه و، د زندان ګمارل شوی کس شهید قطب رحمه الله ته راغی او ويې ویل: که څو لنډې جملې ولیکې خلاص به شې، هغه کلمې داسې وې: ما تېروتنه کړې او له دولت څخه بښنه غواړم.
خو شهيد قطب رحمه الله مسکی شو او په هئيبت سره يې وویل: هيڅکله به له دې زاړه کور سره د ابدي ژوند سوداګري/ معامله ونکړم، کله چې مسؤل کس دا ځواب واورېد، ویې ویل: اې سيده! ته مړ شوې؛ خو شهید سید قطب رحمه الله وویل: برکت دی هغه مرګ چې د الله جل جلاله په لار کې د الله جل جلاله لپاره وي.
د اعدام ورځ یې راورسېده؛ د سهار تر لمانځه وروسته يې شهید قطب رحمه الله د اعدام د لرګي په لور روان کړ او د الازهر له لویانو څخه یو شېخ ورته راغی او د (لا اله الا الله) کلمه يې ورته وویله، خو شهید قطب رحمه الله په ډېرې مېړانې، حوصلې او مسکا سره شیخ ته وویل: اې بېوزله! زه د (لا اله الا الله) کلمې لپاره شهيد کېږم خو ته په دنیا کې تر ډېره د پاته کېدو لپاره دا کلمه وايې.
او په پای کې، د ۱۹۶۶ز کال د اکسټ مياشت کې اعدام او د خدای لوري ته ورغی. تقبله الله!