کابل ټکی کام (چهارشنبه، ۸ وږی، ۱۴۰۲ل)
په کابل کې د علماء کرامو او متنفذينو د ولسي غونډې پرېکړه ليک:
۱- په کابل کې د علماء کرامو او متنفذينو ولسي غونډه د افغانستان اسلامي امارت د خپل مجاهد ولس د کوشش او قربانيو ثمره بولي او ملاتړ يې د ټولو شرعي او ملي وجيبه بولي؛
۲ـ علماء کرام او مخور پر امارت غږ کوي ،چې نړۍ سره په تعامل کې د اسلامي شريعت، خپلواکۍ او د افغانستان د حيثيت، ملي مصالحو او د عصر د غوښتنو په نظر کې نيولو سره سم له لازمې تګلارې څخه کار واخلي او له نړيوالې ټولنې هم غوښتنه کوي چې د افغانستان حاکم نظام او ځمکنيو واقعيتونو سره معقول او مسئولانه چلن او تعامل وکړي، ترڅو د دواړو لوريو ترمنځ د لازم تفاهم او بشپړ رسمي تعامل زمينه برابره شي؛
۳- اسلامي امارت دې، د خپل اقتصاد محوره بهرني سياست پر بنسټ له ګاونډيانو او د سيمې له هيوادونو سره اقتصادي اړيکي نوري هم پياوړي کړي، تر څو د هيواد په صادراتو او وارداتو کې سهولتونه زيات شي او افغاني محصولاتو ته ښه مارکېټ پيدا شي؛
۴ـ د غونډې ګډونوال د هيواد په ټولو تجارانو او سرمايه دارانو غږ کوي، چې په هيواد کې پانګونه زياته کړي او هيوادوالو ته د کار بوختياوې برابرې کړي؛
۵ـ علماء او مخور له اسلامي امارت څخه غواړي، چې په هيواد کې د پانګونې، معدنياتو او په ښارونو کې د تعميراتو د جوړولو په اړه په قوانينو او حکومتولۍ کې سهولت زيات کړي او خنډونه له منځه يوسي ترڅو پروسې چټکې او ساده شي او هم د کار فرصتونه زيات شي؛
۶ ـ د غونډې ګډونوال په هيواد کې د ديني او معاصرو علومو پر ضرورت او د تعليمي او روزنيزو بنسټونو په پياوړتيا ټينګار کوي او له اسلامي امارت څخه غواړي، چې د اسلامي ارزښتونو او د افغاني ټولنې د دودونو په پام کې نيولو سره په دې برخه کې رغنده اقدامات وکړي؛
۷ ـ علماء کرام او د غونډې ګډونوال د نشه يي توکو سره د مبارزې، د روږدو کسانو د راټولولو او درملنې، د ګدايانو ستونزو ته رسيدگي او هغه ناوړه دودونو چې د جامعې د گمراهي سبب گرځېدل د مخنيوي په برخه کې د افغانستان د اسلامي امارت د مدبرانه او مشفقانه کړنو ستاينه کوي او په ټولنه کې د اصلاحي پروګرامونو په تدريجي او نرم ډول د تطبيق په برخه کې له امارت څخه د لا زياتې پاملرنې غوښتنه کوي؛
۸ـ د غونډې ګډونوال پر ټولو ملکي او نظامي امارتي ادارو غږ کوي، چې د فساد پر وړاندې مبارزې ته ژمن پارتې شي او پرې نږدي چې څوک امارت بدنام، ولس ازار او بيت المال ته زيان واړوي؛
۹ـ د غونډې ګډونوال په هيواد کې د سرتاسري امنيت او ثبات څخه خوښي څرګندوي او پر امنيتي او دفاعي ادارو غږ کوي چې د هيواد د امنيت د تامين او د سرحدونو د ساتنې په برخه کې ځانګړې پاملرنه همداسې جدي ولري او اجازه ورنه کړي چې راغلي امنيت او ثبات د فتنهګرو او ورانکارو ډلو لخوا وننګول شي.
۱۰ـ د غونډې ګډونوال له نړيوالې ټولنې څخه جدي غوښتنه کوي چې له موجوده حکومت سره لازمې مالي مرستې وکړي او د بانکي بنديزونو د لرې کولو او د افغانستان د کنګل شوې شتمنۍ د ازادېدو په برخه کې دې چټک ګامونه واخلي.
۱۱ـ موږ د غونډې ګډونوال د اسلامي امارت له ټولو مسئولينو څخه په کلکه غوښتنه کوو، چې د عاليقدر امير المؤمنين حفظه الله ټول حکمونه او فرامين په اړوندو برخو کې عملي کړي او سرغړونکو سره جدي چلند وکړي.
۱۲ـ موږ د غونډې ګډونوال يو ځل بيا د اسلامي امارت له مشرتابه د عاليقدر امير المؤمنين حفظه الله
سره د خپل بيعت تجديد کوو، همدغه شان موږ د کابل ولايت مرکز او ولسواليو ټول ولسونه د اسلامي امارت حمايت او ملاتړ اعلانوو.
