کابل ټکی کام (چهارشنبه، ۲۲ وږی، ۱۴۰۲ل)
د افغانستان اسلامي امارت رئیس الوزرا محترم الحاج ‘ملامحمدحسن اخند” نن له غرمې مخکې د افغانستان لپاره د چین د نوي سفیر ښاغلي “جاو شینګ” باورلیک د یو لړ تشریفاتي مراسمو په ترڅ کې ومانه.
په ارګ کې په دې مناسبت جوړه شویو مراسموکې چې د بهرنیو چارو وزرات سرپرست وزیر مولوي امیرخان متقي هم حضور درلود، محترم رئیس الوزرا د چین نوي سفیر ته ښه راغلاست ووایه
د افغانستان لپاره د چین نوي سفیر په افغانستان کې پر خپل نوي ماموریت خوښي وښوده او وې ویل، دا زما لپاره د ویاړ ځای دی چې په افغانستان کې د چین د سفیر په توګه خپله دنده پیلوم.
نوموړي همدارنګه د چین د ولسي جمهوریت د مشرتابه نېکې هیلې او سلامونه دافغانستان اسلامي امارت رئیس الوزرا محترم الحاج ملامحمدحسن اخند ته وړاندې کړل.
ښاغلي جاو شینګ وویل، چین د افغانستان د ښه ګاونډي په توګه د افغانستان استقلال، ځمکنۍ بشپړتیا او د پرېکړو استقلالیت ته بشپړ درناوی لري.
نوموړي په ټینګار سره وویل چې چین د افغانستان په کورنیو چارو کې د لاسوهنې پالیسي نه لري.
دغه راز نه غواړي چې افغانستان د خپل نفوذ ساحه وګرځوي.
ښاغلي جاو شینګ څرګنده کړه، موږ خوشاله یوو چې په تېرو دوو کالو کې د اقتصاد، امنیت د تامین ترڅنګ فساد، جرایمو او نشه یي توکو سره د مبارزې په برخه کې زیات پرمختګونه رامنځته شوي دي.
زه به کوښښ وکړم چې د سیاست، اقتصاد او نورو برخو کې د چین او افغانستان اړیکې او همکارۍ لا پیاوړې شي.
ورپسې د اسلامي امارت محترم رئیس الوزرا د چین له مشرتابه څخه د سفیر په توګه د ښاغلي جاو شینګ د مقررۍ له امله مننه وکړه.
او هیله یې وښوده چې ستاسو معرفي کېدل د دواړو هیوادونو ترمنځ د ډيپلوماتیکو اړیکو لوړې کچې ته پورته کېدل او د نوي څپرکی پیلامه ده.
محترم رئیس الوزرا د افغانستان او چین ترمنځ اړیکې مهمې وبللې.
اود اشغال له خاتمې وروسته په تېرو دو کلونو کې د افغانستان او چین ترمنځ مناسبات او همکارۍ یې په ښه کچه کې یادې کړې او د دوه اړخیزو اړیکو د لا پیاوړتیا لپاره یې د نورو ګامونو د پورته کېدو هیله هم څرګنده کړه.
