کابل ټکی کام (پنجشنبه، ۲۹ وږی، ۱۴۰۲ل)
د دوو ورځو په تېرېدو سره د اذربایجان او ارمنستان ترمنځ جګړه د روسیې د سولهساتو ځواکونو په منځګړیتوب د ۸۰۰ کسانو تر وژل کېدو وروسته درېدلې ده.
آذربایجان چې د سهشنبې په ورځ د سپټمبر په ۱۹ مه یې د ناګورنو قره باغ پر لاره د «ترهګرۍ ضد» وژونکې حمله پیل کړه، د چهارشنبې په ورځ د سپټمبر په ۲۰ مه د شاوخوا ۸۰۰ کسانو له وژل کېدو وروسته ودروله.
د ارمنستان د اجراییه ریاست پخواني مشر، روبن واردانیان رویټرز ته ویلي چې د دغو بریدونو په پایله کې شاوخوا ۸۰۰ کسان وژل شوي او سلګونه نور ټپیان شوي دي.
هغه زیاته کړه: “آذربایجان هر اړخیز عملیات او لوی جنګ پیل کړی، چې اصلي موخه یې له سیمې د ارمني قوم ایستل دي.
خو اذربایجان د ارمنستان د قومي تصفیې تورونه ردوي او زیاتوي چې دا بریدونه د ترهګرۍ ضد دي او په باکو کې د ماین د چاودنې له امله د څلورو پولیسو په ګډون د شپږو کسانو د وژل کېدو په غبرګون کې شوي دي.
قره باغ د اذربایجان او ارمنستان تر منځ یو له تر ټولو تاوتریخجن غرنیو سیمو څخه ده. د نړیوالو قوانینو له مخې د قره باغ سیمه د اذربایجان د خاورې برخه ده، خو اوس په دې سیمه کې ارمنیان ژوند کوي.
له دغه بریدونو وروسته ملګرو ملتونو او امریکا د دې جګړې سمدستي ودرولو غوښتنه وکړه.
د ترکیې ولسمشر رجب طیب اردوغان پرون د ملګروملتونو په عمومي غونډه کې په خپله وینا کې وویل: قره باغ د اذربایجان د خاورې یوه برخه ده او بل هیڅ حالت ورته د منلو نه دی.
