کابل ټکی کام (شنبه، ۲۷ لړم، ۱۴۰۲ل)
د فلسطین روغتیا وزارت مسوولان وايي چې د غزې د الشفا روغتون کې د تېرو ۴۸ ساعتونو پر مهال د برښنا نشتون او اسراییلي ځواکونو چاپو له امله ۲۴ شهیدان شوي دي.
الجزیرې خبري شبکې نن شنبه د یاد روغتون د رییس “محمد ابو سلمیا” له قوله راپور ورکړی چې ۲۲ ناروغان یوازې په یوه شپه کې شهیدان شوې دي.
د تېرې اوونۍ د چهارشنبې ورځې راهیسې یاد روغتیايي مرکز د اسراییلي ځواکونو لهخوا کلابند شوی او روغتون ته ټولې غځېدلې لارې تړل شوې دي.
روغتون کې د برښنا نشتون له کبله ټولې حیاتي چارې په ټپه درېدلې دي. اسراییل ادعا کوي چې د یاد روغتون لاندې د حماس ډلې غړي پټ ځایونه لري او له دې ځایه د تونلونو له لارې پر اسراییلي ځواکونو بریدونه کوي.
خو حماس ډلې او د الشفا روغتون چارواکي بیا د اسراییلي/ ترهګریز سازمان دغه ادعا بې بنسټه بولي او رد کړې یې ده.
د فلسطین روغتیا وزارت ویلي چې پر الشفا روغتون د اسراییلو برید د یاد روغتون ډېری تاسیسات ویجاړ کړي دي.
