کابل ټکی کام (چهارشنبه، ۲۹ لیندۍ، ۱۴۰۲ل)
د تورکیې استخباراتي ادارې خبر ورکړی، چې د سوریې لپاره یې د داعش ترهګرې ډلې اداري او مالي مسؤل “حذیفه الموري” نیولی.
د ترکیې استخباراتي ادارې (MİT) نوموړی ترهګر د تورکیې په مرسین ولایت کې د عملیاتو په ترڅ کې نیولی دی.
د امنیتي سرچینو څخه د ترلاسه شویو معلوماتو له مخې، حذیفه الموري چې د داعش ترهګرې ډلې د سوریې اداري او مالي مسؤل دی او د ترهګرو په جلب او جذب کې مهم رول درلود ، د یو څه مودې تعقیب او څار څخه وروسته ونیول شو.
په دغو عملياتو کې د نوموړې سره ٢٨ زره اته سوه ډالره، ١٤ زره ٩٥٠ يورو، ٣١ زره اته سوه ليرې او په دې سازمان پورې اړوند ګڼ شمېر ډيجيټل توکي نيول شوي او د داعش ترهګرې ډلې د پيسو د ليږدونې لپاره کارول شوي موبايل اپليکېشنونه هم کشف شوي دي.
په خبرپاڼه کې ویل شوي، چې حذیفه الموري له دغه سازمان سره د یو ځای کېدو د بهیر، په سوریه او تورکیه کې د هغه د فعالیتونو، د داعش د ترهګرې ډلې د غړو چې له هغه سره په تماس کې وو او د پیسو د لېږد په اړه مفصل معلومات ورکړل.
