کابل ټکی کام (چهارشنبه، ۲۰، ۱۴۰۲ل)
د اسرائیلي اشغالګرو په هوایي برید کې د لبنان د اسلامي مقاومتي ډلې حزب الله د مشر “سید حسن نصرالله” مرستیال او د بې پیلوټه الوتکو د سمبالونکې لېوا مشر “علي حسین برجي” وژل شوی دی.
صهیونیستي پوځ د یوې خبر پاڼې په خپرولو کې ویلي، چې د حزب الله دغه تر ټولو مهم سیاسي او پوځي مشر یې د لبنان په سویل کې د یو هوایي برید په پایله کې وژلی دی.
د حزب الله مقاومتي غورځنګ ویاند “المنار” تلویزیوني شبکې سره په خبرو کې د “جنرال علي حسین برجي” د وژل کېدو پخلی کړی او په خبره یې نوموړي په تېرو ۳ میاشتو کې په اسرائیلي اشغالګرو سلګونه بریالي بریدونه ترسره کړي و او ګواښ یې کړی، چې غچ به یې اخلي.
د ویلو ده، چې د اسرائیلي اشغالګرو په هوایي بریدونو کې د روانې میاشتې په دویمه په بیروت کې د حماس د سیاسي دفتر مرستیال “صالح العاروري” او د تیرې دوشنبې په ورځ د لبنان په جنوب کې د حزب الله یو بل لوړی پوړی قومندان “ویسام حسین الطویل” هم شهیدان شوي و.
