کابل ټکی کام (سه شنبه، ۲۶ مرغومي، ۱۴۰۲ل)
ایراني رسنیو خبر ورکړی، چې نن ماښام د سپاه پاسداران ځواکونو د پاکستان-ایران په یوې سرحدي سیمه کې د «جیش العدل» وسله والې ډلې پر مرکزونو د بالستیک توغندیو بریدونه کړي دي.
تسنیم خبري آژانس په خپل راپور کې ویلي، چې د پاکستان د “پنجګور” ښار ته څېرمه د ایران او پاکستان ترمنځ په سرحدي سیمه کې د “جیش العدل” وسله والې ډلې درې مرکزونه په بالستیک توغنديو په نښه شوي دي.
دغه خبري آژانس زیاته کړې ده چې د سپاه پاسداران انقلابي ځواکونو د جیش العدل مرکزونه د توغندیو او بې پیلوټه الوتکو په وسیله ویجاړ کړي دي.
دا په داسې حال کې ده، چې ایران تېره شپه په عراق کې د امریکا پر پوځي اډو، کونسلګرۍ، د کردانو پر مرکزونو، د اسرائیلي څارګرې ادارې «موساد» په یو مرکز او په سوریه کې د داعش ترهګرې ډلې پر مرکزونو هم بریدونه کړي وو.
د ویلو ده، چې تر اوسه پورې د جیش العدل په مرکزونو د ایران په بریدونو کې د احتمالي ځاني او مالي زیانونو په اړه جزئیات نه دي خپاره شوي.
