کابل ټکی کام (دوشنبه، ۲ سلواغه، ۱۴۰۲ل)
د افغانستان اسلامي امارت ویاند ذبیح الله مجاهد په افغانستان کې د ملګروملتونو د استازولۍ یوناما لخوا خپور شوي راپور تر ډيره په ناسم پوهاوي ولاړ بللی او زياته کړې يې ده، چې يوناما دې په ناخبرۍ سره د افغانستان د خلکو په ديني ارزښتونو نيوکې نه کوي.
په افغانستان کې د ملګروملتونو نمایندګۍ یا یوناما یو راپور خپور کړ چې په تیرو ۳ میاشتو کې يې په افغانستان کې بشري وضعیت په کې ارزولی دی.
د مجاهد په خبره په دې راپور کې ډېر تمرکز د اسلامي شریعت د تطبیق په مواردو شوی چې له شرعي احکامو څخه د یوناما په ناخبري او حتی په ځينو مواردو کې په اسلامي احکامو باندې د نیوکو بڼه لري.
ښاغلي مجاهد زياته کړې، چې
د افغانستان اسلامي امارت د خپل ولس په ملاتړ د اسلامي شریعت د احکامو د تطبیق لپاره خورا سترې قربانۍ ورکړی، اوس يې چې حاکمیت په لاس کی دی، باید د اسلامي شریعت ټول موارد که هغه د نارینه وو پورې اړه لري یا تر ښځينه وو پورې بشپړ تطبیق کړي.
د ښځو حجاب، له ښځو سره د شرعي محرم اړتیا، د ښځو د کار او تعلیم لپاره شرعي چاپیریال، همدا ډول د محاکمو لخوا په شرعي بڼه د شرعي سزاګانو تطبیق، په ټولنه کې د فکري او عقیدوي انحراف مخنیوی، دا ټول د یوه متعهد اسلامي حکومت شرعي وجیبه او دنده ده.
د مجاهد په خبره کوم کارونه چې د اسلامي امارت د امربالمعروف وزارت، محاکم او یا نور اصلاحي نهادونه یې ترسره کوي، هغه له ژور تحقیق وروسته د اسلامي امارت د مشرتابه په حکم ترسره کیږي چې هم شرعي او هم قانوني بڼه لري، دا نه کومه خپلسري ده اونه هم د چا په حق تیری، بلکې برعکس دیادو احکامو نه تطبیق ظلم او تجاوز ته لاره هواروي او د اسلامي احکامو ترک کول د ټولنې د فساد، بغاتونو او جنګونو د راپاریدو سبب ګرځي.
د يادونې وړ ده، چې په دې وروستيو کې د یوناما له لوري خپور شوي درې مياشتني راپور کې تر ډېره حده په بشري موضوعاتو تمرکز شوی و او د اسلامي امارت په کې په ځینو مواردو کې له بشري حقونو په سرغړونه تورن شوی و.
