بیجېنګ واشنګټن ته: د اسلامي امارت د سفیر باورلیک منل یوه عادي ډيپلوماټیکه چاره ده
کابل ټکی کام (پنجشنبه، ۱۲ سلواغه، ۱۴۰۲ل)
د چین د بهرنیو چارو وزارت ویاند وانګ وینبین نن پنجشنبه ( د سلواغې په ۱۱مه) په خپل اېکس لیکلي چې د بیجېنګ له خوا د اسلامي امارت د سفیر باورلیک منل یو عادي ډیپلوماتیک عمل او یوه عادي چاره ده.
د چین د بهرنیو چارو وزارت ویاند له نړیوالو غوښتي چې له اسلامي امارت سره خپلې اړیکې لا پراخی او زیاتې کړي؛ څو نړۍ ته د خپلو چارو په اړه قناعت ورکړي.
نوموړي دا هم وویل چې د اسلامي امارت اړوند د چین تګلاره باثباته، رڼه او څرګنده ده.
تر دې مخکې واشنګټن له بیجېنګ غوښتي وو چې له اسلامي امارت سره د خپلو اړیکو څرنګوالی روښانه کړي.
د چین د بهرنیو چارو وزیر د وزارت ویاند دا خبرې په داسې حال کې کوي، چې وړمه ورځ سه شنبه ( د سلواغې په نهمه) د چین د ولسمشر لخوا په خپل هېواد کې د اسلامي امارت د سفیر د باورلیک ومانه.
د چین د ولسمشر له خوا د اسلامي امارت د سفیر باورلیک منلو وروسته د امریکا ولسمشر جوبایډن وویل چې بیجېنګ دې د اسلامي امارت په اړه خپله تګلاره رڼه او څرګنده کړي.
د امریکا د بهرنیو چارو وزارت ویاند، متیو میلر وړمه ورځ سهشنبه د سلواغې ۱۰مه په یوه خبري غونډه کې د چین د ولسشمر لخوا د اسلامي امارت د سفیر د باور لیک منلو ته یاد غبرګون ښودلی و.
یاده دې شي چې وړمه ورځ سه شنبه په بیجینګ کې د اسلامي امارت د لوی سفیر بلال کریمي باورلیک د چین ولسمشر شي جنپنګ له خوا د یو لړ ځانګړو تشریفاتي مراسمو په ترڅ کې ومنل شو.
بلال کریمي د روان کال په ډسمبر کې په بیجینګ کې د چین ولسي جمهوریت د بهرنیو چارو وزارت ته د باورلیک د کاپي له سپارلو وروسته د افغانستان اسلامي امارت په لوی سفارت کې کار پیل کړی و.
تر دې وړاندې د افغانستان اسلامي امارت رییس الوزرا ملامحمدحسن اخند هم د روان کال د وږي په ۲۲ مه د چین د سفیر باورلیک منلی و.
بل پلو امریکا وایي چې له اسلامي امارت سره د بیجېنګ د اړیکو پراختیا به د کابل پر وړاندې د واشنګټن سیاسي تګلاره بدله نه کړي.
اوسمهال بیجېنګ او کابل له یوه بل سره غوره ډيپلوماټیکې اړیکې لري او هیله شته چې دا اړیکې لاپسې پراخې شي.
