کابل ټکی کام (دوشنبه، ۱۶ سلواغه، ۱۴۰۲ل)
نن په مقبوضه کشمير د هندوستان د ولکې ۷۶ کلیزه ده د پاکستان په ګډون په ډېرو هېوادونو کې کشمیریانوسره د یو والي ورځ لمانځل کېږي.
د کشمیریانو سره د یو والي ورځ د پاکستان په ګډون په د نړۍ په ځینو نورو هیوادونو کې هم لمانځل کېږي او کشمیري ولس سره د یو والي او د هندوستان د نا مشروعې ولکې پر ضد لاریونونه ترسره کیږي.
پاکستان کې نن دوشنبه د فبروۍ ۵ مه په ټول هیواد کې عمومي رخصتي اعلان شوې او تمه ده، چې د بېلا بېلو سياسي او مذهبي ګوندونو له خوا به لاريونونه هم ترسره شي.
د کشمیریانو سره د یو والي ورځې په مناسبت به پلازمېنه اسلام آباد کې یوه ستره غونډه هم جوړه شي، چې به پکې لوړ پوړي حکومتي چارواکي هم برخه واخلي.
دا په داسې حال کې ده، چې پرون یکشنبه د پنجاب ایالت په مرکز لاهور کې د جماعت اسلامي ګوند په مشرۍ د كشمير او فلسطين سره د ملاتړ ښودلو تر عنوان لاندې یو ستر لاریون تر سره شوی و.
پلازمېنه اسلام آباد کې د اطلاعاتو چار سمبالي وزیر “مرتضی سولنګي” يوې خبرې ناستې ته د خبرو پر مهال ویلي، چې دا ممکنه نه ده چې هندوستان مقبوضه کشمیر په هدیره بدل کړي. پاکستاني ولس او حکومت د خپلو کشمیري ورونو او خویندو تر څنګ ولاړ دی.
