کابل ټکی کام (سه شنبه، ۱۷ سلواغه، ۱۴۰۲ل)
د افغانستان اسلامي امارت د بهرنیو چارو وزارت په خپلې رسمي اېکس پاڼې لیکلي چې سرپرست وزیر مولوي امیرخان متقي د ملګرو ملتونو د ځانګړي همغږي کوونکي فریدون سینیرلي اوغلو سره کتلي دي.
وزارت دا خبر پرون دوشنبه ( د سلواغې په ۱۶مه) په خپلې رسمي اېکس پاڼې لیکلی و.
د بهرنیو چارو وزارت له یادښته چې مولوي امیرخان متقي په دې ناسته کې د ملګرو ملتونو د ځانګړي همغږي کوونکي فریدون سینیرلي اوغلو سره د اسلامي امارت پر وروستیو دیپلوماتیکو پرمختګونو، د دو حې پر ناستې، بیجېنګ کې د افغان سفیر د باور لیک پر منلو، ازبکستان کې افغان ډیپلوماټانو ته پر سفارت سپارنې او نورو هراړخیزو موضوعاتو بحثونه کړي دي.
مولوي امیرخان متقي لومړی اوغلو ته د (افغانستان د سیمهییزې همکارۍ ابتکار) په تړاو او په بیجینګ کې د افغانستان د سفیر د باورلیک منلو اړوند مالومات وړاندې کړل او دا يي
په ډیپلوماتیک ډګر کې د اسلامي امارت لپاره هیلهبښونکي پرمختګونه وګڼل.
د افغانستان اسلامي امارت د بهرنیو چارو وزیر مولوي امیرخان متقي ښاغلي اوغلو ته په روښانه ټکو وویل چې اسلامي امارت له ملګرو ملتونو سره رغنده تعامل ته لېوالتیا لري، همداشان د دوحې غونډې د بریا هیله کوي او په دې برخه کې یې د ښاغلي سینیرلي اوغلو هڅې وستایلې.
د بهرنیو چارو وزیر مولوي امیرخان متقي د ملګرو ملتونو د امنیت شورا د ۲۷۲۱ پرېکړهلیک په تړاو د اسلامي امارت دریځ روښانه کړ او په وینا یې چې د یوناما په شتوالي کې د کوم بل استازې ګومارنې ته اړتیا نه لیدل کیږي.
اوغلو په خپلو خبرو کې وویل چې د تېرې اوونۍ (د افغانستان د سیمهییزې همکارۍ ابتکار) ناسته یې له نږدې څارلې او د بریالۍ غونډې په ترسراوي د بهرنیو چارو وزارت ته مبارکي وایي.
د ملګرو ملتونو همغږيکوونکي د دوحې د ناستې، د خپلو سفرونو او بحثونو په اړه مالومات وړاندې کړل او ټینګار یې وکړ چې د دوحې ناستې موخه افغانستان سره د یوې دوامداره پروسې له لارې د نړیوالې ټولنې پرلپسې تعامل دی؛ څو په سیاسي برخه کې لا زیات پرمختګونه وشي.
اوغلو تمه درلوده چې نړیوال بانک به په نږدې راتلونکې کې د افغانستان په اړه مثبته پرېکړه وکړي، پر افغانستان بانک به شته بندیزونه پای ته ورسوي. اوغلو انګیري چې د دوحې تر ناستې وروسته به له کابل سره د نورو هیوادونو راشه درشه او ډیپلوماټيکي اړیکې زیاتې شي.
نوموړي ویلي چې دوحې راتلونکې غونډې ته د اسلامي امارت استازي بلل شوي او په دې تړاو یې د ګډونوالو نظر اخیستې ده. ده هیله څرګنده کړه چې د دوحې په ناسته کې به د اسلامي امارت پلاوی په لوړه کچه ګډون وکړي.
د ناستې په پای کې د بهرنیو چارو وزیر مولوي امیرخان متقي د ملګرو ملتونو د همغږي کوونکي فریدون سینیرلي اوغلو مننه کړې. متقي ویلي چې اسلامي امارت له ملګرو ملتونو سره د ګډ کار هیله لري او په ټوله کې د دوحې ناسته یو غوره فرصت ګڼي. وزیر زیاته کړه، چې د غونډې د جوړښت، اجنډا او ترکیب په تړاو له مفصلو مالوماتو وروسته به اسلامي امارت د ګډون او نه ګډون پرېکړه وکړي.
