کابل ټکی کام (چهارشنبه، ۹ کب، ۱۴۰۲ل)
غزه کې د حماس اسلامي غورځنګ د پوځي څانګې “القسام” پیاوړي قومندان او په اسرائیلو د 7 اکتوبر د بریدونو طراح “یحیی سنوار” په خپلو تازه څرګندونو کې ویلي، چې خپلو موخو ته تر رسېدو به جګړې ته دوام ورکوي.
نوموړي ته نږدې سرچینو د “سنوار” په حواله ویلي، چې اسرائیلو د جګړې په ډګړ کې ماته خوړلې او اوس هڅه کوي، چې خپلو ناوړه موخو ته د رسېدو لپاره د اوربند تر درواغجنو شعارونو لاندې ځانونه ورسوي.
د حماس غورځنګ د دغه پیاوړي پوځي قومندان په خبره ځواکونه یې د لوړ مورال د لرلو ترڅنګ پر ټولې غزې بشپړ کنترول لري، هره ورځ ګڼ شمېر صهیونیستي پوځیان وژني او تل أبیب ته یې د ډالۍ په توګه ورلیږي.
یحیی سنوار داسې مهال دا څرګندونې کوي، چې د مصر، ترکیې، قطر، امریکا، فرانسې او ځینو نورو هېوادونو په منځګړیتوب د حماس غورځنګ او اسرائیلو ترمنځ د اوربند او د بندیانو د تبادلې په اړه خبرې اترې روانې دي او تمه کېږي، چې تر روژې وړاندې به دواړه لوري لومړی پر موقت او وروسته پر یو تلپاتې اوربند هوکړې ته ورسېږي.
د ویلو ده، چې نن ځینو اسرائیلي رسنیو خبر ورکړی و، چې نتنیاهو غواړي د اوربند تر پلي کېدو وړاندې یحیی سنوار شهید او یا ژوندی ونیسي. د کتونکو په باور د “یحیی سنوار” وژل یا نیول کومه اسانه چاره نه ده، ځکه اسرائیل یې له لومړۍ ورځې د وژل په هڅه کې دي؛ خو نوموړی یې تل له له دامونو روغ وتلی ده.
