ولسمشر اردوغان اسرائیلو ته: الأقصی جومات ته د لمونځ کوونکو په ننوتلو بندیز به ناوړه پایلې ولري
کابل ټکی کام (چهارشنبه، ۱۶ کب، ۱۴۰۲ل)
د ترکیې ولسمشر “رجب طیب اردغان” په خپلو تازه څرګندونو کې اسرائیلو ته خبرداری ورکړی، چې الأقصی جومات د لمونځ کوونکو په ننوتلو بندیز به ناوړه پایلې ولري.
ولسمشر اردغان د خپلو خبرو پر دوام ویلي، د اقصی او فلسطین قضیه ټول اسلامي اُمت پورې اړه لري. اقصی جومات ته د لمونځ کوونکو په ورتګ بندیز ټوله اسلامي نړۍ را پارولی شي، چې پایلې به یې اسرائیلي غاصب او نا مشروع ريژیم لپاره ډېرې ناوړه وي.
ولسمشر اردغان د خپلو خبرو پر دوام په منځني ختیځ کې روان حالات د اسرائیلي ريژیم په زیان بللي او په خبره یې لبنان، عراق، سوریه او یمن کې د صهیونیستي ريژیم پر وړاندې د اُمت بیداري په ډاګه کوي، چې اسلامي اُمت درد شریک دی او یوالی یې کولی شي، چې د صهیونیستي ريژیم جرړې وباسي.
د ویلو ده، چې ولسمشر اردغان یوځل بیا د یو داسې خپلواک فلسطیني دولت په جوړېدلو ټینګار کړی، چې پلازمېنه به یې “بیت المقدس” وي. نوموړي ویلي، چې د حماس، اسلامي جهاد او نورو فلسطیني مقاومتي ډلو سره یې اړېکې شته او هڅه کوي په قاهره کې د اسرائیلو او فلسطیني مقاومتي ډلو ترمنځ یو داسې اوربند ته زمېنه برابره کړي، چې تل پاتې وي او په پایله کې یې یو ټولشموله فلسطیني دولت رامنځته شي.
