کابل ټکی کام (شنبه، ۲۶ کب، ۱۴۰۲ل)
د حوثیانو اړوند “المیادین” تلویزیوني شبکې خبر ورکړی، چې د حماس اسلامي غورځنګ او انصارالله ترمنځ د عملیاتي همغږۍ لپاره رامنځته کولو په موخه غونډه شوې ده.
د یمني حوثیانو د پوځي څانګې “انصارالله” بنسټګر مشر “عبدالمالک حوثي” المیادین تلویزیوني شبکې سره په ځانګړې مرکه کې ویلي، چې د تېرې پنجشنبې په ماښام د یمن په پلازمېنه “صنعا” کې د ده تر مشرۍ لاندې د حماس اسلامي غورځنګ مشرانو سره خبرې شوي او هدف یې په سره سمندرګي، عدن خلیج او افریقا کې پر امریکایي، برېتانوي او اسرائیلي بېړیو د روانو عملیاتو لپاره د همغږۍ رامنځته کول و، چې دواړه لوري پرې سلا شوي دي.
په ورته مهال حماس ته نږدې سرچینو “العربیه” تلویزیوني شبکې سره په خبرو کې منلی، چې تېره اوونۍ د یاد غورځنګ د پوځي څانګې”القسام لېوا” ځینو مشرانو یمن ته سفر کړی او هلته یې د عبدالمالک حوثي په ګډون له لوړ پوړو یمني چارواکو سره لیدلي دي.
د حماس اسلامي غورځنګ د سرچینو په خبره د د دوی او یمني مشرانو تر منځ یوه بریالی غونډه شوې، چې د اسرائیلو پر ضد د «مقاومت د اقداماتو د همغږي کولو پر میکانیزم» پکې خبرې اترې شوې دي.
له دغو سرچینو څخه یوې سرچینې د نوم د نه ښودلو په شرط وویل: تېره اونۍ یوه مهمه غونډه وشوه چې په ترڅ کې یې د حماس، اسلامي جهاد او د فلسطین د ازادۍ لپاره د خلکو د جبهې جګپوړو قوماندانانو د یمن د وسله والو ځواکونو له قوماندانانو سره وکتل.
د دغې سرچينې د معلوماتو له مخې، په دې کتنه کې په راتلونکي پړاو کې د مقاومت د اقداماتو په اړه د دغو ډلو ترمنځ د همغږۍ پر ميکانيزم خبرې وشوې.
یوې بلې سرچینې چې نه یې غوښتل نوم یې واخیستل شي وویل: “انصارالله ډلې په دې غونډه کې ټینګار وکړ، چې په سور سمندرګي کې به د اسرائیلو د بېړیو پر ضد خپلو عملیاتو ته دوام ورکوي.
د ویلو ده، چې دا لومړی ځل دی، چې د حماس اسلامي غورځنګ او د نورو فلسطیني مقاومتي ډلو مشران یمن ته سفر کوي او هلته له یمني چارواکو سره د صهیونیستي ضد فعالیتونو په هکله خبرې کوي.
