کابل ټکی کام (جمعه، ۳ وری، ۱۴۰۳ل)
له یمن وروستي ورکړل شوي راپورونه وایي، چې د پلازمېنه “صنعا” په ګډون د دغه هېواد په ګڼو ښارونو د امریکایي او برېتانوي اشغالګرو په هوایي بریدونو کې ۱۶ تنه وژل شوي او لسګونه نور ټپیان شوي دي.
د یمن دولتي تلویزیون د یاد هېواد د وسله والو ځواکونو د سرچینو په حواله خبر ورکړی، چې امریکایي او برېتانوي اشغالګرو نن جمعه ۲۲ مارچ سهار وختي پر پلازمینې “صنعا” او حدیده ولایتونو کې پر ځینو اهدافو هوایي بریدونه کړي، چې په پایله کې یې د یمني ځواکونو ۱۶ تنه غړي شهیدان شوي او ۴۰ نور ټپیان شوي دي.
د امریکایي پوځ مرکزي قوماندانۍ خبر ورکړی، چې یاد بریدونه یې تېره ورځ د حوثي ځواکونو له لوري د یوې برېتانوي او امریکایي بېړيو د ویشتلو په غچ کې ترسره کړي دي.
د یو بل خبر له مخې د امریکایي او برېتانوي اشغالګرو له هوایي بریدونو سره همهاله د حدیده ولایت اړوندو سیمو کې حکومت ضد وسله والو د یمني ځواکونو په شپږو اډو بریدونه کړي، چې له امله یې د یمن د وسله والو ځواکونو ۳ غړي شهیدان او ګڼ نور ټپیان شوي دي.
د یمن دولتي تلویزیون خبر ورکړی، چې د یاغیانو بریدونه یې په شا تمبولي او په چاڼیزو عملیاتو کې یې لسګونو یاغیانو ته مرګ ژوبله اړولې ده.
د ویلو ده، چې د یمن وسله وال پوځ د یوې اعلامیې په خپرولو سره حکومت ضد وسله وال د امریکا-برېتانیا، اسرائیلو او سعودي غلامان بللي، د اوربند په ماتولو یې تورن کړي او خبرداری یې ورکړی، چې پر وړاندې به یې ځپونکي عملیات ترسره کړي.
