کابل ټکی کام (شنبه، ۴ وری، ۱۴۰۳ل)
د یمن د حوثیانو د مقاومتي سازمان انصارالله مرستیال مشر “محمد عبدالسلام” په خپلو تازه څرګندونو کې ویلي، چې د امریکا-برېتانیا وحشیانه بمبارۍ به موږ د غزې د مظلوم ولس له ملاتړ څخه لاس په سر نه کړي.
نوموړي، چې نن یې د یمن پلازمېنه صنعا کې یوې خبري ناستې ته خبرې کولې وویل: امریکایي او برېتانوي اشغالګرو تېره شپه د پلازمینې “صنعا” په ګډون د یمن پر څو ښارونو وحشیانه هوایي بریدونه کړي دي.
د نوموړي په خبره د اشغالګرو په بریدونو کې د یمن د وسله والو ځواکونو ۳ تنه غړي او ۷ تنه ملکي وګړي شهیدان شوي او یو شمېر نور ټپیان شوي دي.
د ویلو ده، چې د انصارالله مرستیال مشر یوځل بیا پر خپل دریځ ټینګار کړی او په خبره یې ترڅو چې غزه کې د صهیونیستي غاصب ريژیم وحشتونه روان وي په غچ کې به یې دوی هم په امریکایي او برېتانوي اهدافو خپلو بریدونو ته دوام ورکوي.
