لیکوال ریحان وردګ
له کله هم چې عثماني خلافت نړېدلی دی او د اسلامي نړۍ په قلمرو د کفارو پوځیان حاکمان شوي دي، د اسلامي شعائرو سپکاوی، مقدساتو ته توهین او د مسلمانانو په سرحداتو تېری د عصر کفارو خپل عادت ګرځولی دی.
د مسلمانانو واکمنان د دې پر ځای چې د خپل ځان، خپلو خلکو او خپلو اماکنو د حفاظت په خاطر اتفاق او اتحاد ته راټول شي، د فحشاء، شرابو او دنیوي عیش و ععشرت په مرداریو کې ښکېل دي.
دا خو پر ځای پرېږده د افسوز خبره دا ده چې نوي نسل مو د دیني او عصري علومو د تحصیل پر ځای خپل ټول قېمتي وخت په ټیک ټاک، انسټګرام، فیسبوک او یوټیوب باندې ضایع کړی دی، د هېچا سره هم د خپل تېر برم د اعادې فکر نشته، اسلام یواځې تر ملایانو محدود شوی دی، د غلا، زنا، لواطت، فسق او فجور مراکز او سامان آلات د هر سړي تر کوره رسېدلي دي.
د علمي مراکزو یواځې نومان پاتې، د زده کړې او پوهې ګراف آخرې اندازې ته را ښکته شوی دی.
فرض کړه اوس یو کافر راځي زما په کور کلي او ممکلت یرغل کوي، زما عزت او ناموس ته لاس اچوي او ماته مې په خپل کور کې رد او بد وایي زما په اند حق لري چې دغسې عمل راسره وکړي، زه مجبور یم تر څو په وحشت او بربریت یې سترګې پټې کړم، که احیاناً غټه توره مې وکړه ایله دومره به وکړم چې راسره شوی ظلم په رډو رډو سترګو وغندم، ځکه د فریاد اورېدلو ځوانان خو مې د کرکټ او بوټبال په لوبغالي کې مصروف پاتې، دوی خوراکیان به لوبه ګټي او که زما د عزت ګټلو ته به را دانګي؟ پیاوړی فوځ هم نلرو چې د خپل عزت او خپل کور حفاظت ورباندې وکړو، د اټومي اسلحو د جوړولو او لاسته راوړلو خواري موږ نه ده کړې تر څو د کافر مقابله ورباندې وکړو، جنګي بېړۍ، ډرون، هلیکپټر، بي ٥٢ تیارې او د دوښمن له لمنځه وړلو کشفي وسایل او لوازم هم نلرو تر څو خپل دوښمن ته د یوه وار په مقابل کې پرې دری ځله جواب ورکړو آخر وکړو چیش؟
اصلي هدف ته مې راځم.
که څه هم زما تحلیل او سپارښتنه کمزورې ده خو نن یې د خپل زړه له درده لیکم، د اسلامي نړۍ او خصوصاً د افغانستان حاکمان دې په خپل ټول توان او قوت سره علمي مراکز چې مدارس، مکاتب او پوهنتونونه پکې دخیل دي پیاوړي او قوي کړي، د خلکو او ټولنې د عقیدوي روزنې تر څنګ دې عصري علومو ته تر دې اندازې کار وکړي تر څو دا هیواد په تمامه معنا له نړیوالو قدرتونو سره په اقتصادي راشه درشه کې، په ټکنالوژۍ کې، په طبابت کې، په صنعت او سوداګرۍ کې سیال وګرځي.
که موږ اټومي اسلحې ولرو، فوځ ولرو، ښه پیاوړی اقتصاد ولرو، په طبابت کې سیالان پاتې شو، پوهان ولرو، سیاستمداران ولرو، فیلسوفان ولرو بیا د اندلس او غرناطې غرونه زموږ خپل دي، د اقصی د آزادۍ خوبونه ریښتیا دي او د غزې غندنه راته پیغور ده.
مګر که موږ په همدې روان وضیت کې بند پاتې شوو، فکرونه مو په عبثیاتو مشغول کړو، ځوانان مو په کرکټ او ډرامو کې ښکېل پرېږدو، له دې زرینې موقع استفاده ونکړو، لرې نه ده چې یوځل بیا مو الله تعالیﷻ د خپل غفلت له رویه یو پر بل ووهي.
معاصره زمانه د ټکنالوژۍ او پرمختګ زمانه ده، یهود او ملګري یې یواځې له هغوی وېره لري د چا چې زور او قوت په لاس کې پروت دی، تاسو نه وینی غزه کې په څلور میاشتو کې تقریباً تر څلوېښتو زرو پورې مسلمانان چې ښځې، ماشومان او سپینږیري پکې شامل دي، شهیدان شوي دي، کورنه یې نړېدلي دي، ځمکې یې اشغال شوې دي، خو موږ او اسلامۍ نړۍ بیا هم د اسرائیلي رژیم د دې بې بېلګې تجاوز یواځې په غندنو اکتفاء کوو، ځکه موږ وس نلرو، توان نلرو، اسلحه نلرو، رادار نلرو، تیارې او ټانګان نلرو.
دا منم چې جنګ په عقیده کېږي خو که د عقیدې تر څنګ اسلحه او قوت ولرې د بریا بیا سل فیصده امکان شته، موږ خدای پیدا کړي د دې لپاره یو تر څو له کافر سره وجنګیږو، خو د دې تر څنګ راته الله تعالیﷻ د ټرېنېنګ کولو او د ټکنالوژۍ په پیدا کولو هم امر کړی دی، دا هر څه په قرآن پاک ثابت شوي.
زه یو مثال وړاندې کوم.
تیره ورځ په روسیه کې په یوه هوټل باندې د څو حمله کونکو لخوا وسلوال برید ترسره شو چې شاوخوا تر ١٦٠ پورې کسان پکې مړه او ټپیان شول، په پای کې د هوټل چت هم د قوي اور لګېدنې له رویه ونړېد. د برید مسؤلیت که څه هم ظاهر داعش په غاړه واخیست خو تر شا یې د قوي استخباراتو لاس وو، ځکه خو د روسیې ولسمشر پوتین هم د غچ اخستلو اخطار اوکراین ته ورکړ.
د افغان حکومت په ګډون د سیمې اکثریت هیوادونو دا برید په کلکو ټکو وغنده، خو د شمالي کوریا مشر د غندلو تر څنګ ووېل چمتو یو تر څو د دې برید طراحان که هر څوک هم وي له روسیې سره په ګډه له منځه یوسو.
د نوموړي له دې خبرو د دوی (شمالي کوریا) زور، قوت او په ښکاره توګه له امریکا سره ډغرې وهل جوتیږي، ځکه شمالي کوریا، اټومي اسلحې لري، زرو لري، وړتیا لري، امریکایان وېره هم ورځینې لري، چې هر څه ووایي هغه په عمل کې ثابتولی هم شي.
خو برعکس ضعیفو هیوادونو یواځې غم شریکي وړاندې کړه، هېچا هم د امریکا له ډاره ونه وېل چې د برید طراحان به له روسیې سره په ګډه له منځه وړو.
نو پکار ده تر څو د خپل حاکمیت او د مسلمانانو د حفاظت په خاطر هغه څه تر سره کړو له کوم څه چې شرقي او غربي کفار بده وړي، چې دا کار د مدارسو، مکاتبو او پوهنتونو په ځوانانو خواري کول دي.
تاسو ورشئ په اطرافو کې د تعلیمي ادارو احوال واخلئ چې هغه د څه ډول وضیت سره مخ دي؟ مدارس په کوم حال پاتې او له مکاتبو څه جوړ شوي؟
موږ که ریښتیا هم ځانونه د تېر برم د اعادې مدعیان بولو ولې د دې لوی هدف د ترلاسه کولو په پار معیاري کار ته اوږه نه ورکوو؟
پای
