کابل ټکی کام (سه شنبه، ۲۱ وری، ۱۴۰۳ل)
اسرائیلي رسنیو خبر ورکړی، چې د مصر پلازمینې قاهره کې یې د مذاکراتي پلاوي غړو حماس اسلامي غورځنګ ته د بندیانو په بدل کې ۹۰۰ فلسطینیان خوشې کولو وړاندیز کړی ده.
دغه راز منځګړو هېوادونو چې ډېره ونډه پکې د قطر، ترکیې او مصر ده له حماس غوښتي، چې د اسرائیلو نوی وړاندیز ومني؛ خو حماس غورځنګ ته نږ دې سرچینو ویلي، چې یاد وړاندیز نه مني او د دوی مهمې غوښتنې پکې له پامه غورځول شوي، چې هغه له غزې تړانګې په بشپړه توګه د اسرائیلي پوځیانو وتل، د غزې محاصره ختمول، غزې ته د بشري مرستو لیږد ته اجازه ورکول او د غزې استوګنو ته بېرته اجازه ورکول ترڅو خپلو کورونو ته ستانه شي.
د حماس اسلامي غورځنګ د سیاسي دفتر غړي او پخواني ویاند “اسامه حمدان” لبنان کې یوې خبري ناستې ته د خبرو پر مهال ویلي، چې لومړی دی اسرائیل د دوی یادې مهمې غوښتنې ومني او له هغه وروسته به بیا د بندیانو په تبادلې خبرې کېږي.
د ویلو ده، چې وړمه ورځ د مصر په پلازمېنه “قاهره” کې د ترکیې، قطر او امریکا په منځګړیتوب د حماس- اسرائیلو ترمنځ د سولې خبرې پیل شوي؛ خو د حماس سرچینې ادعا کوي، چې اسرائیل هڅه کوي یادې خبرې اترې ناکامه کړي.
