کابل ټکی کام (چهارشنبه، ۵ ثور، ۱۴۰۳ل)
د ترکيې ولسمشر “رجب طيب اردغان” وايي، چې د فلسطيني ډلو ترمنځ يووالی اسرائيل ماتولی شي. نوموړي هيله څرګنده کړې ده، چې ډېر ژر به اشغالګر اسرائيل د غزې د جنوب په څېر په ټولو سيمو کې ماته وخوري. ولسمشر اردغان د فلسطين پر واکمن ګوند “الفتح” او حماس اسلامي تحريک غږ کړي، چې خپل داخلي اختلافات يوې خواته کړي او د فلسطين د راتلونکي ټولشموله حکومت د رامنځته کېدو لپاره يوې هوکړې ته ورسېږي. ولسمشر اردغان يوځل بيا د فلسطيني مقاومت کوونکو ډلو په ځانګړې توګه د حماس غورځنګ ننګه کړې ده او ياده ډله يې د فلسطين سياست کې يو برلاسی غورځنګ بللی دی. ولسمشر اردغان د خپلو خبرو پر دوام ويلي: حماس د فلسطين په سياست کې يو منل شوی حقيقت دی او هيڅوک يې له صحنې نه شي ايستلي. دغه راز ولسمشر اردغان واکمن “الفتح” ګوند هم يو مهم جوړښت بللی او ټينګار يې کړی، چې بايد يادې دواړه ډلې پر يو داسې حکومت هوکړې ته ورسېږي، چې د ټول فلسطيني ولس لپاره د منلو وړ وي. د يادونې وړ ده، چې د ترکيې ولسمشر دغه څرګندونې دغه هيواد ته د حماس اسلامي غورځنګ د مشر “اسماعيل هنيه” په مشرۍ له ورغلي پلاوي سره له کتنې وروسته کړي دي. د کتونکو په باور فلسطيني ډلو ته د ولسمشر اردغان وړانديز ګټور تماميدلی شي.
