کابل ټکی کام (پنجشنبه، ۶ ثور، ۱۴۰۳ل)
د سپوتنيک خبري آژانس د راپور له مخې روسي ځواکونو د دونيتسک ولايت ستراتيژيکه سيمه “نووميخايلوفکا” له اوکرايني ځواکونو نيولې ده. د روسيې دفاع وزارت د يوې خبر پاڼې په خپرولو سره ويلي، چې د يوې اوونۍ سختو او خونړيو نښتو څخه وروسته يې ځواکونه و توانيدل، چې دغه ستراتيژيکه سيمه تر خپل کنترول لاندې راولي. د روسيې دفاع وزارت وايي، چې د يادې ولسوالۍ د نيولو په عملياتو کې ۲۱۳ اوکرايني پوځيان وژل شوي، سلګونه يې ټپيان شوي او لسګونه نور يې ژوندي نيول شوي دي. دا په داسې حال کې ده، چې د دونيتسک ښار نورې برخې څو مياشتې وړاندې روسي ځواکونو نيولې وې؛ خو ياده ولسوالۍ، چې پوځي هوايي ډګر هم پکې شتون لري له سختو جګړو وروسته د روسانو لاس ته ولويده. د يادونې وړ ده، چې د اوکراين دفاع وزارت هم د “نووميخايلوفکا” ستراتيژيکې سيمې د بايللو خبر تائيد کړی دی او يو ځل بيا يې د امريکا په ګډون له غربي هيوادونو غوښتي، چې اوکرايني ځواکونو ته دې درنې وسلې په واک کې ورکړي.