روسي ځواکونو خارکیف ته څېرمه یو ستراتیژیک ښار نیولی

کابل ټکی کام (چهارشنبه، ۲۶ ثور، ۱۴۰۳ل)

په داسې حال کې، چې روسي ځواکونه د اوکراین په دویم ستر ښار کې خارکیف کې خپل پرمختګ ته دوام ورکړی، تازه د روسیې دفاع وزارت خبر ورکړی، چې خارکیف کې یې د “بوګروواتکا” سراتیژیک ښارګوټی نیولی دی. د سپوتنیک خبري آژانس د خبر له مخې یاد ښارګوټۍ د خارکیف زړه بلل کېږي، یوه مهمه سیمه ده او د یو پوځي هوایي ډګر په ګډون پکې د اوکرایني ځواکونو څلور اډې او د وسلو بې شمېره زیرمې شتون لري. د روسیې دفاع وزارت ادعا کړې، چې تر خونړیو نښتو وروسته یې په یاد ښار ولکه بشپړه کړې ده او د جګړو په ترڅ کې یې ۱۳۵ اوکرایني پوځیان وژلي دي. د یادونې وړ ده، چې د اوکراین دفاع وزارت هم خبر ورکړی، چې له یاد ښار څخه یې ځواکونو شاتګ کړی؛ خو په خبره یې ځوابي برید ته په چمتوالي پوخت دي.