کابل ټکی کام (سه شنبه، ۱۲ چنګاښ، ۱۴۰۳ل)
له غزې ورکړل شوي راپورونه وایي، چې حماس ځواکونو سره په نښتو کې ۶ اسرائیلي پوځیان وژل شوي او ګڼ نور ټپیان دي. د حماس اسلامي غورځنګ د پوځي څانګې سرچینو د مقاومت اړوند “الأقصی” تلویزیوني شبکې ته ویلي، چې ځواکونو یې د غزې تړانګې شمال او “رفح” ښارګوټي کې د صهیونیستي اشغالګرو پر دوه اډو بریدونه کړي، چې په پایله کې یې د غزې په شمال کې ۴ او رفح کې ۲ اشغالګر پوځیان وژل شوي دي. په ورته مهال د اسرائیلي پوځ رادیو هم خبر ورکړی، چې د غزې تړانګې په “شجاعیه” سیمه کې یې پر ځواکونو د بې پیلوټه الوتکې برید شوی؛ خو پکې د اوښتې مرګ ژوبلې په هکله یې څه نه دي ویلي. دا په داسې حال کې ده، چې وړمه ورځ هم صهیونیستي ريژیم غزه کې د خپلو دوه پوځیانو وژل کېدل تائید کړي و؛ خو د حماس غورځنګ پوځي سرچینو یې بیا شمېر ۱۲ تنه ښودلی و.
