د جنرال دوستم خپل سرو عملیاتو په حکومت کې دننه اندېښنې راولاړې کړي دي

کابل ټکی کام ۰۹کب/۱۳۹۴، راپور: فرید احمد
په روان هـ ش کال کې د ولسمشر لومړي معاون درې ځله د افغانستان په شمال کې د طالبانو په خلاف خپل سري عملیات پیل کړي دي، دغه عملیات په فاریاب، جوزجان او سرپل کې پیل شوي دي.
شپږ میاشتې وړاندې د فاریاب ولایت د قیصار، المار، پښتون کوټ، خواجه سبزپوش، شیرین تګاب او دولت اباد ولسواليو کې جنرال دوستم خپل عملیات وکړل، خو نتیجه یې تر کابل پورې تښتېدل وو.
د سرپل په کوهستاناتو ولسوالۍ کې هم جنرال دوستم خپل جګړه ماران په اسلحو سمبال کړل، او د طالبانو په ضد یې عملیات پیل کړل، خو په هر ځای کې یې سره له دې چې عامو وګړو ته زیانونه واړول، د طالبانو په خلاف ناکام راغی.
فتح الله قیصاري وايي، دا عملیات بې ځایه دي، په داسې حال کې چې دولت منطقې ساتلی نشي، نو څه ګټه چې هلته جګړې زور واخلي، او طالبان بېرته منطقه ونیسي.
تېر کال هم دوستم د ملي اردو سره یوځای د جوزجان خم اب ولسوالۍ ته ورغی، خو هلته د طالبانو له سخت مقاومت سره مخ شو، ان تر دې چې په تېښته یې ځانونه وژغورل.
فوزیه کوفي د بدخشان د خلکو نماینده وايي، دا عملیات ناکام دي، ځکه چې دولتي ځواکونه مناطق نشي نیولای، او که منطقې ونیسې هم، طالبانو لاسته بېرته لویږي، او تلفات هم مونږ ته اوړي.
دا دی اوس دوستم خپل عملیات د قوشتېپې له سیمې څخه پیل کړي دي، او وايي چې سیمې به له طالبانو څخه نیسې.
په کابل کې یوه پوځي کارپوه چې له نوم ښودنې څخه یې ډډه وکړه وايي، د دوستم جګړه د قوم پرستۍ په بنیاد ولاړه ده، او په شمال کې پښتانه وژل کیږي.
دی وايي، چې په شمال کې د طالب په نامه د پښتنو عزت او مال ته زیانونه اړول کیږي، خو دولت یې هیڅ پروا هم نلري.
د کورنیو چارو وزارت پخوانۍ معاون میرزا محمد یارمند هم ورته نظر لري، او وایي، دوستم شمال ته سفر کوي، او هلته د طالب پر وړاندې مبارزه کوي، د دولتي ځواکونو په مټ سیمې له طالبانو څخه تصفیه کړي، خو چې کله کابل ته راستون شي، نو طالبان بېرته ساحې ونیسي، او هغه خلک له منځه یوسي چې له دولت سره یې مرسته کړي وي، نو دې کار له ګټې څخه تاوان زیات کړی دی.
په کومو ساحو کې چې اوس جنرال دوستم خپل عملیات بیا پیل کړي دي، یو ځل مخکې یې هم اعلان کړه چې د طالبانو له وجود څخه یې پاکې کړي دي، نو اوس بیا هغه سیمو ته ورځي او بیا یې پاکوي، او دا به بیا طالبان نیسي، او دی به بیا ورځي، او دا تسلسل به همداسې جاري وي، خو تاوان به یې عامو خلکو او دولت ته رسیږي.