کندهار کې ۴ پولیس د خپلو ملګرو له لورې وژل شوي دي

کابل ټکی کام ۱۱کب/۱۳۹۴، احمدالله مهاجر
یوې ځايي باوري سرچینې رسنیو ته ویلي دي، چې تېره شپه د کندهار-اروزګان پر لويه لاره په تروغ نومي سيمه کې یوه پوسته چې ۱۴ پولیسو پکې حضور درلود، قومندان یې په رخصتۍ تللی وو، د دغې پوستې ۴ کسان وژل شوي دي، او ۱۰ کسان بې درکه دي.
یادې سرچینې زیاته کړې ده، چې له پوستې څخه ټول نظامي مهمات هم وړل شوي دي.
یاده سرچینه وایي، ښایي، د دغې پوستې له پولیسو څخه به یو هم د طالب وسله والو نفوذي پولیس وو، او د طالبانو سره به یې رابطه نیولي وي، او یاده پېښه به یې را منځته کړي وي.
د کندهار د امنیه قومندان ویاند ضیاء دراني هم د یادې پېښې پخلی کړی دی، او ویلي یې دي، چې یاده پېښه په کندهار کې نه، بلکې په روزګان کې ترسره شوې ده.
نوموړي د یادې پېښې په اړه نور مالومات ور نکړل.
د روزګان امنیه قومندانۍ هم په یاده پېښه کې د پولیسو وژنه تأییدوي.
د روزګان ولایت د امنیه قومندانۍ سرپرست سمونوال محمد اکبر شینواري رسنیو ته ویلي دي، چې د یادې پوستې پولیسو له طالبانو سره اړیکه درلوده.
هغه زیاته کړچې تېره شپه طالب پلوو پولیسو طالبان پوستې ته دعوت کړي وو، او د طالبانو په مرسته یې ۴ پولیس ووژل، مګر ۳ نور پولیس بې درکه شوي دي.
لا تر دا مهاله طالبانو یې په اړه څه نه دي ویلي.