کابل ټکی کام (شنبه، ۱۷ لیندۍ، ۱۴۰۳ل)
په داسې حال کې، چې د تحریرالشام په مشرۍ حکومت مخالفو وسله والو ادلب،حلب، درعا او ځینې نورې سیمې له حکومتي ځواکونو نیولي دي. د لبنان حزب الله غورځنګ اړوند “المنار” تلویزیوني شبکې خبر ورکړی، چې زرګونه جنګیالي یې پلازمینې دمشق او حمص ښارونو ته رسیدلي او مهمو سیمو کې ځای پر ځای شوي دي.
حزب الله غورځنګ وروسته له هغه دا خبر ورکوي، چې مشر “شیخ نعیم قاسم” وړمه ورځ ویلي و، چې د سوریې حکومت ترې رسمي غوښتنه کړې، څو د جګړې لیکو ته جنګیالي ور ولیږي.
المنار دغه راز خبر ورکړی، چې جنګیالي یې دا مهال د حمص ښار اړوندو سیمو کې له حکومت مخالفو وسله والو سره په جګړه کې ښکیل دي او ادعا یې کړې، چې ځینې سیمې یې له وسله والو بېرته نیولي او د حمص پر لور یې د هغوی پرمختګ درولی دی.
