کابل ټکی کام (شنبه، ۵ سلواغه، ۱۴۰۳ل)
غزه تړانګه کې د اوربند هوکړې له پلي کېدو وروسته حماس غورځنګ یو ځل بیا څلور اسرائیلي بندیانې خوشې کړې.
دې غورځنګ یادې اسرائیلي بندیانې نن (شنبه، د جنوري ۲۵مه) غزه ښار کې سره صلیب ته وسپارلې. ټاکل شوې چې اسرائیلي رژیم به هم ۲۰۰ فلسطیني بندیان ازاد کړي.
د راپورونو له مخې، دې اسرائیلي بندیانو د صهوینستي رژیم په پوځ کې دندې درلودې.
اسرائیلو تایید کړې، چې سره صلیب ته سپارل شوې څلور خوشې شوې بندیانې یې ور رسېدلې دي.
تېره اونۍ هم د غزې د اوربند هوکړې په لومړۍ مرحله کې درې اسرائیلي بندیانې خوشې شوې او په مقابل کې یې ۹۰ فلسطینیان ازاد شول. پر دې سربېره غزې ته د بشري مرستو د ننوتو اجازه هم ورکړل شوې ده.
د اوربند د هوکړې له مخې به اسرائیلي عسکر د غزې په مرکز کې له نتزاریم دهلیز سیمې څخه هم وځي او سلګونه زره بېځایه شویو فلسطینیانو ته به اجازه ورکوي، تر څو د دې تړانګې په شمال کې خپلو مېنو او کورونو ته ور ستانه شي.
دغهراز اسرائیل به رفح بندر د بشري مرستو او نورو سوداګریزو توکو د لېږد لپاره پرانیزي.
د یادونې وړ ده، چې غزه کې د روانې میاشتې پر ۱۹مه اوربند پیل شو او پر بنسټ یې ۱۵ میاشتنۍ جګړه پای ته ورسېده.
