ولسمشر اردغان: هېڅوک دا حق نه لري چې فلسطينيان له خپلې خاورې وباسي

کابل ټکی کام (دوشنبه، ۲۲ سلواغه، ۱۴۰۳ل)
د ترکيې ولسمشر رجب طيب اردوغان وړمه ورځ په يوه خبري کنفرانس کې له غزې څخه د فلسطينيانو د ايستلو په تړاو د امريکا د ولسمشر ډونالډ ټرمپ پلان رد کړی او ويلي يې دي، چې هېڅوک له دې تړانګې فلسطينيان نه‌شي ايستلاي.نوموړي زياته کړې، هېڅوک دا ځواک نه لري، چې د غزې ولس د هغوی له ټاټوبي وباسي.ښاغلي اردوغان ټينګار کړی، چې غزه، لوېديځه غاړه او ختيځ بيت المقدس په فلسطينيانو پورې اړه لري.له اردوغانه وړاندې د يو شمير عربي هېوادونو چارواکو هم له غزې څخه د فلسطينيانو بې ځايه کيدل رد کړي وو.د امريکا ولسمشر ډونالډ ټرمپ د روانې فبروري مياشتې په څلورمه نېټه د اسرائيلو له لومړي وزير بنيامين نتانياهو سره په ګډ خبري کنفرانس کې ويلي و، چې ښايي امريکا د غزې کنټرول ترلاسه کړي او اوسېدونکي يې په نورو سيمو کې ځای پر ځای کړي.د ټرمپ دا څرګندونې لا له وړاندې له غبرګونونو سره مخ وې او په خپله امريکا کې هم ديموکراتانو دا ((قومي تصفيه )) بللې وه.