کابل ټکی کام (یکشنیه، ۱۲ کب، ۱۴۰۳ل)
د اسلامي امارت ویاند ذبیح الله مجاهد وایي، په افغانستان کې له امریکایانو پاتې شوي وسلې او تجهیزات جنګي غنیمت دی.
نوموړي د امریکا له ولسمشر ډونالډ ټرمپ غوښتي، چې د افغانستان په اړه له احساساتي خبرو ډډه وکړي او د دغه هېواد په اړه بشپړ معلومات وکړي.
ذبیح الله مجاهد په بګرام اډه کې د چینایانو شتون هم رد کړ او ویلي، چې دغه اډه د دوی په واک کې ده.
مجاهد له ازبکستان څخه هم غوښتي چې د افغانستان پاتې هلیکوپټرې دوی ته وسپاري.
دا په داسې حال کې ده چې د امریکا ولسمشر ډونالډ ټرمپ په خپلو ویناوو کې درې ځله په افغانستان کې پاتې شویو وسلو ته اشاره کړې او ټینګار یې کړی، چې بیرته به یې تر لاسه کړي.
