کابل تکی کام (يکشنبه، ۱۲ کب، ۱۴۰۳ل)
د راپورونو له مخې، اسرائیلي اشغالګرو يو ځل بيا له توافق سرغړونه کړې او غزې تړانګې ته يې د هر ډول بشري مرستو د داخليدو مخه نیولې ده.
د اسرائیلي لومړي وزیر بنیامن نتنیاهو دفتر وايي، حماس تر اوسه پورې د ډونلډ ټرمپ استازي سټېف ویټکاف له لوري په موقت ډول د لومړي پړاو اوربند غځولو وړاندیز له منلو انکار کړی دی او د بشري مرستو بندول هم د فشار په توګه کارول کېږي چې حماس ياد اوربند ومني.
حماس غواړي له لومړي توافق سره سم د اوربند دویم پړاو پیل شي، چې د یرغملو اسرائیلیانو ازادول، د فلسطیني زندانیانو خوشي کېدل او له غزې د اسرائیلي ځواکونو وتل پکې شامل دي.
د اسرائيلو لومړي وزیر دفتر په اعلامیه کې په دې هکله ویل شوي دي: ”د یرغملو هوکړې له لومړي پړاو پای ته رسېدو سره سم، او د حماس له لوري د خبرو دوام په تړاو د ویټکاف وړاندیز له منلو انکار – چې اسرائیل تاييد کړی، لومړي وزیر نتنیاهو پرېکړه وکړه، چې له نن سهار وروسته به غزې ته د ټولو توکو رسېدل ودرول شي. اسرائیل به زموږ د یرغملو له خوشي کېدو پرته د اوربند اجازه ور نه کړي. که حماس خپل انکار ته دوام ورکړي، دا به عواقب ولري.”
په عين حال کې حماس په نړيوالو او تضمين کوونکو غږ کړی چې پر اسراييلو فشار راوړي ترڅو د غزې خلک له لوږې سره مخ نه شي: «د نتنیاهو پرېکړه چې د بشري مرستو ودرول دي، یو ارزانه باج اخیستل، د جګړې جرم، او د توافق پر وړاندې ښکاره کودتا ده زياتوي منځګړي او نړیواله ټولنه باید اقدام وکړي ترڅو پر اشغالګرو فشار راوړي او د هغه ظالمانه او غیراخلاقي اقدامات ودروي، چې له دوه میلیونه ډېر وګړي یې د غزې په تړانګه کې له سختو ستونزو سره مخ کړي دي.
د حماس په اعلاميه کې راغلي: د جګړې مجرم نتنیاهو هڅه کوي چې په ځمکه داسې سیاسي واقعیتونه مسلط کړي، کوم چې د هغه فاشیستي پوځ د ۱۵ میاشتو له وحشیانه نسلوژنې سره سره نشوای ټینګولی. دا زموږ د ولس د زړورتیا او مقاومت برکت دی. هغه غواړي د لاسلیک شوي تړون پر خلاف عمل وکړي، یوازې د خپلو محدودو کورنیو سیاسي ګټو لپاره، او دا هر څه د غزې په بندي اشغالګرو او د هغوی د ژوند پر حساب ترسره کوي.
دغه راز د فلسطین ملي شورا هم په دې اړه په خپره کړې اعلامیې کې د غزې تړانګې د پولې تړل او د بشري، خوراکي او طبي مرستو مخنیوی د جګړې جرم او د بشریت پر ضد جنایت بللی زياتوي موخه یې د خلکو کړاو لا زیاتول دي، په ځانګړې توګه د روژې په مبارکه میاشت کې.
په اعلاميه کې راغلي دا محاصره د جبري بېځایه کېدو د پلان یوه برخه ده، چې د اشغالګر رژیم له خوا د امریکا د ادارې په ملاتړ پر مخ وړل کېږي. دا د نسلوژنې او توکمیز پاکوالي د جګړې یوه برخه ده، چې لسګونه زره قربانیان یې تر اوسه اړولي دي.
ملي شورا ويلي، نړیوال ځواکونه د دې ظالمانه محاصرې مسؤلیت لري، کومه چې د نړیوالو قوانینو ښکاره سرغړونه ده.
د ملي شورا اعلاميه کې زياته شوې وايي، دا حالت د ډلهییزې سزا د دوام څرګندونه کوي، چې د جنیوا د څلورم کنوانسیون د ۳۳مې مادې سرغړونه ده، او هغه بشري ناورین لا ژوروي، چې ملګرو ملتونو رسمي “انساني فاجعه” ګڼلی دی.
موږ د نړیوالې ټولنې څخه د فوري اقدام غوښتنه کوو، ترڅو محاصره ختمه شي، د فلسطیني ولس امنیت یقیني شي، او د نړیوالو تړونونو او د ملګرو ملتونو اړوندو پرېکړو ته عمليبڼه ورکړل شي.
