کابل تکی کام (شنبه، ۱۸ کب، ۱۴۰۳ل)
د افغانستان اسلامي امارت وياند ښاغلي ذبيح اللّٰه مجاهد د افغان ميرمنو په اړه په يوه پيغام کې ويلي، چې مېرمنې زموږ میندې، خوندې، لورګانې او د ژوند شریکانې دي او هغه کوم حقوق چې اسلامي شریعت ورته معرفي کړي، اسلامي امارت د هغو حقوقو په ورکړه او ساتنه ځان مکلف بولي.
نوموړي زياته کړې، چې د ښځو عفت، عزت او شرعي حقوق ساتل د امارت اولویت دی زياتوي افغان میرمنې له فزیکی او رواني پلوه په مصئونیت کې ژوند کوي.
د ښاغلي مجاهد په پيغام کې ويل شوي، چې اوسمهال په افغانستان کې د ښځو پر وړاندې د هر ډول خشونت او تاوتریخوالي مخه نیول شوې او هيڅوک نشي کولای د ښځو حقوق تلف کړي او یا هغې ته په بده وګوري.
نوموړي په خپل پيغام کې د اسلامي امارت له محاکمو غوښتي چې د اسلامي امارت محاکم او نور اړوند ارګانونه مکلف دي چې د ښځو د حقوقو په تأمین کې خپله ټوله هڅه وکړي په خبره يې:«د هغوی د زوجیت اختیار یقیني کړي، د مهر او میراث حق ورته حاصل او د هغوی له ټولو حقوقو څخه ساتنه او څارنه وکړي».
ښاغلي مجاهد دغه راز په خپل پيغام ويلي چې د افغاني ټولنې او غربي ټولنې فرهنګ سره توپيرونه لري او بايد خلک يې د محاسبې پر مهال توپير وکړي زياتوي:«اسلامي شریعت او افغاني ټولنې له فرهنګ او عنعناتو سره سم د افغاني میرمنو ټول اساسي حقونه تامین شوي، خو باید هیره نشي چې موږ د افغان میرمنو حقوق په یوه اسلامي او افغاني ټولنه کې تر بحث لاندې لرو، چې د غربي ټولنې او د هغوی د فرهنګ سره ښکاره توپيرونه لري چې د محاسباتو په وخت کې باید په نظر کې ونیول شي».
