کابل ټکی کام (پنجشنبه، ۷ وری، ۱۴۰۴ل)
د یمن وسلهوالو ځواکونو د فلسطیني ولس د ملاتړ او د هغوی د مقاومت د پیاوړتیا په موخه د اسراییلو پر بن غوريون هوایي ډګر د “ذوالفقار” بالسټیک توغندي برید کړی او همدارنګه یې د یافا اشغال شوې سیمې په جنوب کې یو پوځي هدف د “فلسطین ۲” فوق صوتي بالسټیک توغندي په وسیله ویشتلی دی. د راپورونو له مخې، دغه بریدونه بریالي وو.
د یمن وسلهوالو ځواکونو ویلي، چې د امریکا د دوامدارو بریدونو په غبرګون کې یې د خپل بالستیکي توغندیو، بېپیلوټه الوتکو او سمندري ځواک په همغږۍ ګډ پوځي عملیات ترسره کړې. د دغو عملیاتو پر مهال، د امریکا “ترومان” الوتکه وړونکې بیړۍ او نورې امریکايي جنګي کښتۍ په سره سمندر کې په نښه شوې دي.
په تېرو څو ورځو کې، یمني ځواکونو ویلي چې د امریکايي ځواکونو د پرمختګ هڅې یې شنډې کړې او د هغوی د بریدونو پراخولو پلانونه یې ناکامه کړي دي.
د یمن وسلهوال ځواکونه ټینګار کوي، چې د امریکا بریدونه به د یمن مقاومت نور هم پیاوړی کړي. دوی خبرداری ورکړی، چې راتلونکو ورځو کې به د خپلو دفاعي عملیاتو پراخوالی زیات کړي او د یمن د خلکو د مقاومت ځواک به لا نور څرګند شي.
